Qazaqstandaǵy azamattyq avıatsııa mamandarynyń 40 paıyzy – áıelder
ALMATY. KAZINFORM – Almatyda genderlik teńdikke arnalǵan Halyqaralyq azamattyq avıatsııa uıymynyń (IKAO) aımaqtyq semınary ótip jatyr.
Azamattyq avıatsııa komıtetiniń tóraǵasy Saltanat Tompıeva azamattyq avıatsııadaǵy genderlik teńdik el boıynsha kósh bastap turǵanyn atap ótti.
— Qazir Qazaqstanda azamattyq avıatsııada 23 myń qyzmetker jumys isteıdi, onyń 40%-dan astamy nemese 9 500-ge jýyǵy áıel. Elde 34 áıel ushqysh, tipti ushaq komandırleri de bar, — dedi Saltanat Tompıeva agenttik tilshisine bergen suhbatynda.
Sonymen qatar, respýblıka boıynsha 100-den astam áıel áýe dıspetcher, 600-ge jýyq ınjener-áıel jáne borttyq qyzmette 2200-den astam qyz-kelinshek jumys isteıdi.
— Men tek burynnan er adamǵa tán tehnıkalyq mamandyqtardy aıtyp otyrmyn. Biraq eń bastysy – adamnyń tájirıbesi, maqsaty men kásibıligi. Sondyqtan biz er jáne áıel mamandyqtary týraly stereotıpterden bas tartýymyz kerek. Buryn avıatsııadaǵy áıelder tek bılet sata alatyn nemese stıýardessa bolyp jumys isteı alatyn sııaqty kórinetin. Biraq, shyn máninde, Qazaqstanda avıatsııa salasynda jumys isteıtin jáne ushý qaýipsizdigine jaýapty áıelder kóp, — dep atap ótti Saltanat Tompıeva.
Ol sondaı-aq qalyptasqan stereotıpterge qaramastan, áıelder úshin eshqandaı kedergiler joq ekenin tilge tıek etti.
Sonymen qatar, elimizde genderlik teńdik qoldaýǵa ıe. Mysaly, Qazaqstandaǵydaı bala kútimi boıynsha jumys ornyn saqtap qalý múmkindigi barlyq elde qarastyrylmaǵan.
Halyqaralyq azamattyq avıatsııa uıymyna aımaqtaǵy 56 memleket kiredi, onyń ishinde Qazaqstan da bar.
— Genderlik teńdik taqyrybyna arnalǵan shara alǵash ret ótkizilip otyr. Nelikten Qazaqstan tańdaldy, óıtkeni biz genderlik teńdik pen azamattyq avıatsııadaǵy áıelder sany boıynsha kóshbasshymyz, — dedi ol.
Onyń aıtýynsha, Qazaqstanda avıatsııa salasy qarqyndy damyp keledi.
— Pandemııaǵa deıingi kezeńmen salystyratyn bolsaq, qazir ósim 50 paıyzdan asty, basqa elderde bizdegideı ósim joq. Bizde ishki aǵyn da, halyqaralyq aǵyn da bar, sondyqtan tapshylyq bar. Sondyqtan da biz qazir jastardy salaǵa tartý maqsatynda kóptegen kórme men is-sharalar ótkizip jatyrmyz, — dep túıindedi sózin Saltanat Tompıeva.
Sharaǵa Qazaqstannyń jáne sheteldiń avıatsııa salasynyń, halyqaralyq uıymdardyń (IKAO, Eurocontrol, EASA, IATA, IFATCA, SkyTeam, ACYFI ), avıatsııalyq kompanııalar men isker top ókilderi qatysyp jatyr
Eske salaıyq, buǵan deıin Halyqaralyq azamattyq avıatsııa uıymy (IKAO) Qazaqstannyń azamattyq avıatsııa salasyn 2050 jylǵa deıin damytýdyń strategııalyq bas josparyn ázirleıtini týraly jazǵanbyz.
Sondaı-aq ICAO prezıdenti avıatsııa bolashaǵy men ekologııadaǵy kóshbasshylyq týraly aıtqan bolatyn.