Qazaqstandaǵy avtomobıl joldary jobalaryn jańǵyrtý: tsıfrlar men derekter
ASTANA.KAZINFORM - 2026–2028 jyldarǵa arnalǵan avtomobıl joldary salasyn damytýdyń úsh jyldyq jospary aıasynda Qazaqstanda respýblıkalyq mańyzy bar avtomobıl joldary jelisin aýqymdy jańǵyrtý jumystary jalǵasyp jatyr.
Kólik mınıstrligi málimetinshe, bıyl respýblıkalyq mańyzy bar avtojoldardyń shamamen 8,9 myń shaqyrymy jol jumystarymen qamtyldy. Bul — sońǵy jyldardaǵy eń joǵary kórsetkishterdiń biri. Jalpy alǵanda, elimiz boıynsha barlyq deńgeıdegi 11 myń shaqyrymnan astam avtojol qamtylyp otyr. Jumystar birneshe baǵytta júrgizilip jatyr: halyqaralyq kólik dálizderin rekonstrýktsııalaý, kúrdeli jáne ortasha jóndeý, sondaı-aq jańa magıstraldar salý.
Jobalardyń qatarynda II tehnıkalyq sanattaǵy «Qyzylorda – Jezqazǵan» (400 km) avtomobıl jolyn rekonstrýktsııalaý jobasy bar. Jumystar 2025 jyldyń sáýir aıynda bastaldy.
Qyzylorda oblysyndaǵy 192 shaqyrym tolyq aıaqtalyp, kólik qozǵalysyna ashyldy. Ulytaý oblysyndaǵy 208 shaqyrymda rekonstrýktsııalaý jumystary jalǵasyp jatyr, jobany aıaqtaý 2027 jylǵa josparlanǵan.
Qazir nysanda 6 asfalt-beton zaýyty, 600-den astam tehnıka jáne 1011 adam jumys istep jatyr. «Aqtóbe – Ulǵaısyn» (28 km) jobasynda 2024 jyldyń maýsym aıynan bastap 102 tehnıka men 115 maman jumyldyrylǵan bolsa, búginde olardyń sany 368 tehnıka men 499 tehnıkalyq mamanǵa jetti.
2025 jyldyń qorytyndysy boıynsha asfalt-beton jabyny tóselgen bir jolaqta qozǵalys ashyldy. Ertis ózeni arqyly jańa kópir salý jobasynda 290 qyzmetker men 86 tehnıka jumyldyrylǵan. Kópir ótkeli men oǵan kireberis joldardyń jalpy uzyndyǵy 2,7 shaqyrymnan asady.
Týrıster úshin mańyzdy jobalardyń biri sanalatyn «Óskemen – Rahman qaınary» (28 km) jolynda jol tósemi men kópir qurylystaryn salý jumystary júrgizildi. Qazirgi ýaqytta nysanda 65 tehnıka men 135 adam eńbek etip jatyr.
«Petropavl – Reseı Federatsııasynyń Qorǵan qalasyna deıingi shekarasy» jobasy boıynsha 2024 jyly jalpy uzyndyǵy 30,2 shaqyrym joldyń 15,3 shaqyrymynda qozǵalys ashyldy. Jobany aıaqtap, paıdalanýǵa berý osy jyldyń tamyz aıyna josparlanǵan.
27 shaqyrymdyq Atyraý qalasynyń aınalma jolynda 66 tehnıka men 109 jumysshy jumyldyrylǵan. Jalpy kólemi 1 503 myń m³ bolatyn jer tóseminiń 914 myń m³-i salyndy, 2 kópir men 2 jol ótpesiniń qurylysy júrgizilip jatyr. Jumystardy aıaqtaý 2026 jyldyń sońyna deıin josparlanǵan.
2030 jylǵa deıingi jospar aıasynda jańa iri jobalardy iske asyrý kózdelgen. Olardyń qatarynda «Qyzylorda – Aqtóbe» baǵyty («Qyzylorda – Sekseýil» (462 km), «Aqtóbe – Ulǵaısyn» (234 km), «Ulǵaısyn – Sekseýil» (312 km), «Beıneý – Sekseýil» (800 km)), «Ortalyq – Batys (Astana – Yrǵyz)» (896 km), «Jezqazǵan – Qaraǵandy» (572 km) avtojoldary, sondaı-aq iri qalalardyń aınalma joldary (Saryaǵash aınalma joly – 102 km, Qyzylorda aınalma joly – 26 km jáne Rýdnyı qalasynyń aınalma joly – 17 km) bar.
2026–2027 jyldary aıaqtalýy josparlanǵan jalpy uzyndyǵy 4 myń shaqyrym bolatyn 126 ýchaskede ortasha jáne kúrdeli jóndeý jumystary júzege asyrylyp jatyr. Onyń ishinde 321 shaqyrym kúrdeli jóndeýmen, al 3,6 myń shaqyrymnan astamy ortasha jóndeýmen qamtylǵan. Negizgi baǵyttardyń qatarynda «Jezqazǵan – Petropavl», «Almaty – Shelek – Qorǵas», «Atyraý – Oral», «Jańaózen – Kendirli – Túrikmenstan shekarasy» jáne basqa da joldar bar.
Aıta keteıik, ShQO tasjoldarynda alǵash ret túrli-tústi lazerlik baǵdarlar qoldanyla bastady.
