Ázerbaıjan men Grýzııa Potı men Baký arasynda qatynaıtyn konteınerlik poıyzdy iske qosty

ASTANA. KAZINFORM – Potı men Baký arasyna arnaıy konteınerlik blok-poıyz jiberildi. Ol Kaspıı men Qara teńiz arasyndaǵy júk tranzıtin jetkizý merzimin aıtarlyqtaı qysqartady.

Bul týraly «Grýzııa temir joly» men «Ázerbaıjan temir joldary» JAQ málimdedi dep habarlaıdy Kazinform agenttiginiń menshikti tilshisi.

Potı – Baký baǵyty boıynsha júretin joǵary jyldamdyqty blok-poıyzdy iske qosý rásimi Grýzııanyń Potı portynda ótti. Іs-sharaǵa ÁTJ men «Grýzııa temir joldary» kompanııalarynyń basshylyǵy qatysty.

Temirjol kompanııalary jańa ekspress-qyzmet turaqty keste boıynsha jumys isteıtinin jáne Potı portynan Bakýge konteınerlerdi jetkizýdi, sondaı-aq bos konteınerlerdi keri qaıtarýdy qamtamasyz etetinin atap ótti.

-Qozǵalystyń bekitilgen kestesi men aldyn ala belgilengen tarıfter júk ıelerine logıstıkany anaǵurlym dál josparlaýǵa múmkindik beredi. Bul joba ekonomıkalyq turǵydan tıimdi bolyp, kompanııa tabysynyń ósýine yqpal etedi, — dedi «Grýzııa temir joly» AQ bas dırektory Lasha Abashıdze.

Blok-poıyz júk ıelerine jetkizý merzimin edáýir qysqartyp, júkter men bos konteınerlerdi termınaldarda saqtaý shyǵyndaryn azaıtýǵa múmkindik beredi. Joǵary jyldamdyqty servısti engizý konteınerlerdiń Potı men Baký arasynda kidirissiz, belgilengen merzimde jetkizilýin qamtamasyz etedi.

Blok-poıyzdyń baǵyty Batýmı – Potı – Tbılısı – Apsheron – Sýmgaıyt – Alıat jelisi arqyly ótedi. Osylaısha, Qara teńiz porttary Ázerbaıjannyń porttary men logıstıkalyq termınaldarymen tikeleı baılanysady. Joba aıasynda júk ıelerine «termınaldan esikke deıin» qaǵıdaty boıynsha jeńildetilgen qyzmet usynylady.

Atalǵan bastama Orta dáliz sheńberinde konteınerlik tasymaldardyń tıimdiligin arttyrýdy kózdeıdi jáne halyqaralyq kólik dálizderiniń múmkindikterin keńeıtýdegi kezekti qadam retinde qarastyrylady.

Osyǵan deıin Azııa damý banki Grýzııa qatysatyn mýltımodaldy dálizderdi damytýǵa basymdyq beretini týraly jazdyq.