Qazaqstandaǵy áskerı joǵary oqý oryndaryn attestatsııalaý: jańa erejeler bekitildi
ASTANA. KAZINFORM — Qazaqstan Respýblıkasynyń Ǵylym jáne joǵary bilim mınıstri 2026 jylǵy 22 sáýirdegi buıryǵymen joǵary jáne joǵary oqý ornynan keıingi bilim berý baǵdarlamalaryn júzege asyratyn áskerı jáne arnaıy oqý oryndaryna qatysty memlekettik attestatsııa júrgizý qaǵıdalaryn bekitti.
Memlekettik attestatsııa joǵary jáne (nemese) joǵary oqý ornynan keıingi bilim berý baǵdarlamalaryn iske asyratyn áskerı joǵary oqý oryndaryna (ÁAOO), olardyń vedomstvolyq baǵynystylyǵyna qaramastan, bes jylda bir ret ýákiletti organ tarapynan júrgiziledi.
Attestatsııadan ótetin oqý oryndarynyń tizimin ýákiletti organ bekitedi. Onda attestatsııa ótkizý merzimderi kórsetilip, resmı ınternet-resýrsta jarııalanady.
Jańadan qurylǵan áskerı joǵary oqý oryndary úshin alǵashqy memlekettik attestatsııa mamandardyń alǵashqy túlegi shyqqan sátten bastap bir jyldan keshiktirilmeı ótkizilýi tıis.
Memlekettik attestatsııa barysynda myna baǵyttar men nysandar baǵalanady:
- bilim alýshylar kontıngenti
- kadrlyq áleýet
- bilim berý baǵdarlamalaryn iske asyrýǵa qajetti materıaldyq baza (oqý korpýstary, oqý, ǵylymı jáne arnaıy zerthanalar, tehnıkalyq quraldar, baǵdarlamalyq qamtamasyz etý, sondaı-aq stýdentterge arnalǵan jaǵdaılar – tamaqtaný, jataqhana, medıtsınalyq qyzmet)
- kitaphana qory
- oqý, oqý-ádistemelik jáne tárbıe jumysy
- kásibı praktıka (taǵylymdama)
- ǵylymı-zertteý qyzmeti
Qujatta kórsetilgendeı, memlekettik attestatsııanyń negizgi maqsaty – oqý ornynyń qyzmeti zań talaptaryna jáne joǵary ári joǵary oqý ornynan keıingi bilim berýdiń memlekettik jalpyǵa mindetti standarttaryna sáıkestigin anyqtaý.
Attestatsııa bastalatyny týraly habarlama oqý ornyna keminde bir aı buryn jiberiledi.
Attestatsııanyń ózi 7 jumys kúninen aspaıtyn merzimde júrgiziledi.
Baǵalaý júrgizý úshin ýákiletti organ arnaıy komıssııa qurady. Komıssııa oqý ornynyń bilim berý qyzmetine jan-jaqty ári obektıvti baǵa beredi.
Stýdentterdiń daıyndyq deńgeıin anyqtaý maqsatynda bakalavrıat pen magıstratýranyń bitirýshi kýrs stýdentteri arasynda bilimdi tekserý (srez) ótkiziledi. Bul nátıjeler attestatsııanyń mańyzdy kórsetkishteriniń biri retinde esepke alynady.
Komıssııa barlyq baǵyttar boıynsha alynǵan nátıjelerdi qorytyndylap, attestatsııa qorytyndysy týraly sheshim shyǵarady.
Nátıjesinde oqý ornyna qatysty mynadaı sheshimderdiń biri qabyldanady:
-
attestattalǵan – eger oqý ornynyń qyzmeti barlyq talaptarǵa tolyq sáıkes kelse
-
attestattalmaǵan – eger talaptarǵa sáıkes kelmese
Qorytyndy negizinde 10 kún ishinde ýákiletti organ tıisti buıryq shyǵaryp, oqý ornynyń attestatsııadan ótkenin nemese ótpegenin resmı túrde bekitedi.
Bul aqparat ýákiletti organnyń resmı saıtynda jarııalanady.
Atalǵan buıryq 2026 jylǵy 8 mamyrdan bastap kúshine enedi.
Buǵan deıin Qorǵanys mınıstrligi áskerı qyzmetshilerdiń tólem tártibin jańartqanyn jazǵan edik.
