Qazaqstandaǵy áskerı bilim: Qazirgi oqytý júıesiniń ereksheligi nede
ASTANA. KAZINFORM – Qazaqstanda áskerı kadrlardy daıarlaý júıesi kolledjden bastap doktorantýraǵa deıingi barlyq bilim berý deńgeıin qamtıdy. Qorǵanys mınıstrligi Áskerı bilim jáne ǵylym departamentiniń bastyǵy, polkovnık Murat Oljabaevtyń aıtýynsha, búginde áskerı bilim berý júıesi tájirıbege basymdyq berip, kýrsanttardy qazirgi zamanǵy qaýipsizdik talaptaryna saı oqytýǵa baǵyttalǵan.
Qazaqstanda áskerı mamandar qaıda daıarlanady
Búginde Qorǵanys mınıstrliginiń áskerı bilim berý júıesine Qazaqstan Respýblıkasynyń jalpy bilim berý júıesiniń biryńǵaı normatıvtik-quqyqtyq jáne oqý-ádistemelik keńistiginde jumys isteıtin 9 áskerı oqý orny kiredi.
Olardyń qatarynda úsh áskerı ınstıtýt, bes áskerı kolledj jáne Qazaqstan Respýblıkasynyń Ulttyq qorǵanys ýnıversıteti bar.
Ofıtserler Almatydaǵy Saǵadat Nurmaǵambetov atyndaǵy Qurlyq áskerleri áskerı ınstıtýtynda, Radıoelektronıka jáne baılanys áskerı-ınjenerlik ınstıtýtynda, sondaı-aq Aqtóbedegi Talǵat Bıgeldınov atyndaǵy Áýe qorǵanysy kúshteri áskerı ınstıtýtynda daıarlanady.
Al serjanttar quramyn Astana, Şýchınsk, Qaraǵandy, Shymkent jáne Almaty qalalaryndaǵy áskerı kolledjder daıarlaıdy.
Áskerı bilim berý júıesiniń eń joǵarǵy satysy – Astanadaǵy Ulttyq qorǵanys ýnıversıteti. Munda magıstratýra men doktorantýra baǵdarlamalary boıynsha áskerı mamandar daıarlanyp, Qarýly Kúshterdiń basshylyq quramynyń biliktiligi jetildiriledi.
Áskerı bilim alý júıesi qalaı jumys isteıdi
Murat Oljabaevtyń aıtýynsha, áskerı oqý oryndarynda mamandar tehnıkalyq jáne kásiptik bilim berý, bakalavrıat, magıstratýra jáne doktorantýra baǵdarlamalary boıynsha daıarlanady.
Osylaısha, Qazaqstanda serjanttar quramynan bastap ofıtserler men áskerı ǵalymdarǵa deıingi kásibı ósýdiń úzdiksiz júıesi qalyptasqan.
– Mundaı tásil áskerı qyzmetshilerge qyzmet barysynda bilimin jetildirip, kásibı biliktiligin kezeń-kezeńimen arttyrýǵa múmkindik beredi, - dedi departament basshysy.
Áskerı oqý ornyna qabyldaý kezinde kimderge basymdyq beriledi
Polkovnık Murat Oljabaevtyń aıtýynsha, áskerı oqý oryndaryna qabyldaý qoldanystaǵy zańnamaǵa sáıkes reıtıngtik tizimder negizinde júrgiziledi.
– Eger talapkerlerdiń kórsetkishteri teń bolsa, «Qazaqstan Respýblıkasyndaǵy áskerı qyzmet jáne áskerı qyzmetshilerdiń mártebesi týraly» zańnyń 39-babynda kórsetilgen azamattarǵa basymdyq beriledi. Olardyń qatarynda áskerı qyzmet ótkerý ótili bar áskerı qyzmetshilerdiń balalary, «Altyn belgi» ıegerleri jáne halyqaralyq ári respýblıkalyq olımpıadalardyń jeńimpazdary bar, - dedi spıker.
Áskerı bilim berý júıesinde tájirıbege basymdyq beriledi
Murat Oljabaev qazirgi áskerı bilim berý júıesinde tájirıbege basymdyq beriletinin atap ótti. Sol úshin dalalyq sabaqtarǵa, komandalyq-shtabtyq jáne taktıkalyq-arnaıy oqý-jattyǵýlarǵa kóbirek kóńil bólinedi. Oqý baǵdarlamasy áskerı qyzmettiń naqty jaǵdaıyna beıimdelip qurylǵan.
– Daıyndyq barysynda qazirgi qarýly qaqtyǵystardyń tájirıbesi negizinde ázirlengen stsenarııler paıdalanylady. Kýrsanttar ýaqyt tapshylyǵy, aqparattyń jetkiliksizdigi, sondaı-aq jeke quram men áskerı tehnıkanyń qaýipsizdigi úshin joǵary jaýapkershilik jaǵdaıynda jedel ári tıimdi sheshim qabyldaýǵa mashyqtanady, - dedi ol.
Sonymen qatar oqý baǵdarlamasynyń mindetti bóligi retinde kýrsanttar qoldanystaǵy áskerı bólimderde taǵylymdamadan ótedi. Bul olardyń teorııalyq bilimin tájirıbemen ushtastyryp, oqýyn aıaqtamaı turyp-aq áskerı qyzmettiń naqty jaǵdaıymen tanysýyna múmkindik beredi.
Kýrsanttar drondardy qoldanýdy da meńgeredi
Qazirgi áskerı daıarlyqta ushqyshsyz avıatsııalyq júıelermen jumys isteýge erekshe nazar aýdarylady. Murat Oljabaevtyń aıtýynsha, kýrsanttar barlaý júrgizýdi, atysty túzetýdi, jaǵdaıdy baǵalaýdy, sondaı-aq qarsy taraptyń ushqyshsyz ushý apparattaryna qarsy is-qımyl jasaý tásilderin meńgeredi.
Sonymen qatar olar drondardy bólimshelerdi basqarý júıesine tıimdi engizý daǵdylaryn ıgeredi. Polkovnıktiń sózinshe, qazirgi qarýly qaqtyǵystarda aqparatty jedel alý men dál áreket etý sheshýshi ról atqaratyndyqtan, mundaı quzyretter áskerı mamandardy daıarlaýdyń ajyramas bóligine aınalǵan.
Qorǵanys mınıstrliginiń baǵalaýynsha, úzdiksiz áskerı bilim berý júıesi qazirgi zamanǵy tehnologııalardy meńgergen, áskerı basqarýdyń jańa tásilderin ıgergen jáne kez kelgen jaǵdaıda sheshim qabyldaı alatyn kásibı ofıtserler korpýsyn qalyptastyrýǵa baǵyttalǵan.
Vedomstvo mundaı júıe áskerı qyzmetshilerdiń kásibı deńgeıin turaqty arttyryp qana qoımaı, áskerı ǵylymdy damytýǵa jáne Qarýly Kúshterdiń kadrlyq áleýetin nyǵaıtýǵa múmkindik beretinin atap ótti.
Aıta keteıik, áskerı joǵary oqý oryndary men kolledjderge qujat qabyldaý 31 shildege deıin jalǵasady. Sondaı-aq áskerı oqý oryndaryna qujat tapsyrý jeńildedi, qujatty endi onlaın tapsyrýǵa bolady.
