Qazaqstandaǵy árbir úshinshi oqýshy zııatkerlik saıystarǵa qatysady

Bul týraly «Daryn» respýblıkalyq ǵylymı-praktıkalyq ortalyǵynyń dırektory Tımýr Davlet Ortalyq kommýnıkatsııalar qyzmetinde ótken brıfıngte málimdedi.

Spıkerdiń aıtýynsha, elimizde daryndy oqýshylarmen jumys isteýdiń tıimdi júıesi qalyptasqan. Bul júıe «anyqtaý – irikteý – daıarlaý – qoldaý kórsetý – damytý» qaǵıdaty boıynsha júzege asyrylady.

– Búginde Qazaqstandaǵy árbir úshinshi oqýshy túrli zııatkerlik saıystarǵa qatysady. Bul olımpıadalyq qozǵalystyń keń qanat jaıǵanyn jáne onyń daryndy jastardy anyqtaýda mańyzdy ról atqaratynyn kórsetedi. Aıta ketý kerek, bıylǵy oqý jylynda respýblıkalyq olımpıadanyń mektepishilik kezeńine ǵana 320 myńnan astam joǵary synyp oqýshysy qatysty. Bul qabiletti ári yntaly oqýshylardy erte kezeńnen anyqtaýǵa múmkindik beretin irikteý júıesiniń alǵashqy satysy, – dedi Tımýr Davlet.

Onyń sózinshe, halyqaralyq olımpıadalarǵa qatysýshylardy daıarlaý – daryndy balalarmen júrgiziletin jumystyń negizgi baǵyttarynyń biri.

– Qazaqstannyń ulttyq quramalaryn irikteý kópsatyly júıe arqyly júzege asyrylady. Birinshi kezeń – mektep deńgeıi. Bul kezeńde belgili bir pánderge beıimi men qyzyǵýshylyǵy bar oqýshylar anyqtalady. Ekinshi kezeń – aýdandyq jáne qalalyq deńgeı, onda bilim berý uıymdary arasynan úzdik qatysýshylar irikteledi. Úshinshi kezeń – oblystyq deńgeı. Munda oqýshylar óz óńiriniń namysyn qorǵap, respýblıkalyq kezeńge joldama alý úshin baq synaıdy. Tórtinshi kezeń – respýblıkalyq olımpıada. Onyń qorytyndysy boıynsha elimizdiń olımpıadalyq rezervi qalyptastyrylady, – dedi ortalyq dırektory.

Sondaı-aq ol olımpıadalyq rezerv jasaqtalǵannan keıin ulttyq quramalarǵa úmitkerlerdi arnaıy daıarlaý kezeńi bastalatynyn aıtty.

Aıta keteıik, Qazaqstandyq oqýshylar halyqaralyq olımpıadalarda 1000-nan astam júlde jeńip alǵanyn jazǵanbyz.