Qazaqstanda altyn baǵasy tómendedi: sońǵy baǵam qandaı

ASTANA. KAZINFORM — Qazaqstanda altynnyń grammy 54 862 teńge boldy, dep habarlady Kazinform agenttiginiń tilshisi.

Qazaqstan Ulttyq bankiniń málimetinshe, 10 shildede altynnyń bir grammy 54 862,01 teńge bolady.

Ótken beısenbide, 3 shildede, qymbat metaldyń baǵasy shamamen 55 639 teńge bolǵan.

Buǵan deıin habarlanǵandaı, 2025 jyldyń I toqsanynda Qazaqstanda mys, nıkel, kómir, altyn jáne sırek jer metaldarynyń bolashaǵy zor 38 ýchaske anyqtalǵan.

Eske salaıyq, Qazaqstan altyn qory boıynsha álemniń TOP-20 eli qataryna kirdi. Sońǵy 10 jylda elde altyn quramdas kendi óndirý kólemi 2,2 ese artqan.

Dúnıejúzilik altyn keńesiniń (World Gold Council) málimetinshe, 2025 jyldyń alǵashqy toqsanynda altynǵa jalpy suranys jyldyq esepte 1%-ǵa ósip, 1 206 tonnany qurady — bul 2016 jyldan bergi birinshi toqsan úshin eń joǵary kórsetkish.

Ortalyq bankter 2025 jyldyń birinshi toqsanynda 244 tonna altyn satyp alǵan — bul aldyńǵy toqsanmen salystyrǵanda az.

Sonymen qatar, rekordtyq baǵa aıasynda altyn áshekeılerine degen suranys kúrt tómendegen: kólem jaǵynan 2020 jyldan bergi eń tómengi deńgeıge túsken.

Degenmen, aqshaǵa shaqqanda altynnan jasalǵan áshekeılerge tutynýshylyq shyǵyn jyldyq esepte 9%-ǵa ósip, $35 mlrd-qa jetti.

Qazaqstanda Ulttyq statıstıka bıýrosynyń deregine sáıkes, 2024 jyly altyn buıymdarynyń baǵasy 8,3%-ǵa qymbattaǵan.