Qazaqstandaǵy altyn baǵasy qandaı

ASTANA. KAZINFORM — Qazaqstandaǵy altyn baǵasy grammyna shamamen 57 888 teńge mólsherinde, dep jazdy Kazinform agenttiginiń tilshisi.

Qazaqstan Ulttyq bankiniń derekteri boıynsha, 21 tamyzda grammynyń quny 57 888,24 teńge boldy.

Ótken beısenbi, 14 tamyzda, baǵaly metalldyń quny shamamen 58 149 teńge edi.

Buǵan deıin biz ártúrli elderdiń altyn qorlaryn nege AQSh-ta saqtaıtyny týraly jazǵan edik.

Dúnıejúzilik altyn keńesi (World Gold Council) Qazaqstannyń altyn qory 7,4 tonnaǵa artqanyn habarlady. Osylaısha, eldiń rezervindegi jalpy altyn kólemi 298 tonnadan asty. Halyqaralyq valıýta qory men Eýropalyq ortalyq bank esepke alynbasa, altyn qorlary boıynsha Qazaqstan 18-orynda tur.

Eske salsaq, Ónerkásip jáne qurylys mınıstrligi eldiń paıdaly qazbalarmen qamtamasyz etilý merzimderi týraly jańartylǵan derekterdi jarııalaǵan bolatyn. Sońǵy málimetterge sáıkes, aǵymdaǵy óndirý kólemin eskersek, Qazaqstandaǵy altyn qory 30 jylǵa jetedi.

Astanada banktik altyn quıma qalaı quıylatyny týraly osy jerde oqyńyz.

Buǵan deıin habarlanǵandaı, Qazaqstanda 2025 jyldyń birinshi toqsanynda mys, nıkel, kómir, altyn jáne sırek jer metaldary boljamdy resýrstary bar 38 perspektıvalyq ýchaske anyqtaldy.

Dúnıejúzilik altyn keńesiniń málimeti boıynsha, 2025 jyldyń birinshi toqsanynda altynǵa jalpy suranys jyldyq eseppen 1% ósip, 1 206 tonnaǵa jetti — bul 2016 jyldan bergi eń joǵary birinshi toqsan kórsetkishi.

Ortalyq bankter birinshi toqsanda 244 tonna altyn satyp aldy — bul aldyńǵy toqsanǵa qaraǵanda azyraq.

Sondaı-aq, altyn zergerlik buıymdarǵa suranys rekordtyq baǵalar aıasynda kúrt tómendedi: kólemi 2020 jyldan bergi eń tómen deńgeıge jetti. Óz kezeginde, qundyq mánde altynnan jasalǵan zergerlik buıymdarǵa tutynýshylyq shyǵyndar jyldyq eseppen 9% ósip, 35 mıllıard dollarǵa jetti.

Qazaqstanda, Ulttyq statıstıka bıýrosynyń deregine sáıkes, 2024 jyly altyn buıymdarynyń baǵasy 8,3% ósti.