Qazaqstandaǵy alǵashqy krematorıı iske qosylǵaly qansha qyzmet kórsetti
ALMATY. KAZINFORM — Almatyda elimizdegi alǵashqy krematorıı bıyl sáýir aıynyń sońynda ashylǵan bolatyn.
Ol Qalalyq patologoanatomııalyq bıýro bazasynda jumys isteıdi jáne búgingi tańda shtattyq rejımde qyzmet kórsetip tur. Nysannyń jobalyq qýattylyǵy táýligine 16-dan 24-ke deıin krematsııa júrgizýge eseptelgen. Krematsııa zalynda Chehııadan alynǵan eki pesh qoıylǵan. Olar 800-1000 gradýsta jumys isteıdi.
Qoǵamdyq densaýlyq saqtaý basqarmasy agenttik saýalyna bergen jaýabynda Almatyda krematorıı ashylǵan sátten bastap qaıtys bolǵan adamdardyń denesin órteý boıynsha 6 protsedýra júrgizilgenin habarlady.
— 100 kún jumys ishinde 6 krematsııa júrgizildi. Barlyq jaǵdaıda bul marqumdardyń kózi tirisinde notarıaldy túrde kýálandyrylǵan jazbasha erik-bildirýi negizinde júzege asyryldy, — delingen jaýapta.
Sonymen qatar vedomstvo kórsetilgen qyzmet kólemi tolyqqandy statıstıka qalyptastyrýǵa jáne ornyqty tendentsııalardy anyqtaýǵa áli de jetkiliksiz ekenin atap ótedi. Degenmen kremtorııge keńes alý úshin habarlasatyn azamattardyń qatary artyp keledi.
— Qazirgi ýaqytta halyq tarapynan bul qyzmetke degen qyzyǵýshylyqtyń birtindep ósip kele jatqany baıqalady. Buǵan ýrbanızatsııa, iri qalalardyń zırattarynda bos jer telimderiniń azaıýy, sondaı-aq azamattardyń ekologııalyq saýattylyǵynyń artýy sebep, — dep habarlady basqarma ókilderi.
Eske salaıyq, Almaty ákimdigi 2020 jyly krematorııdiń jobalyq-smetalyq qujattamasyn jasaýǵa tender jarııalady.
Ǵımarattyń qurylysy 2021 jyldyń jeltoqsan aıynda aıaqtalsa da, 2022-2023 jyldardyń aralyǵynda nysannyń ashylýy qaıta-qaıta shegerildi.
2024 jyly Almaty ákimdigi krematorıı qurylysyn júrgizgen merdigerdi sotqa berip, odan 2,7 mln teńge qaıtaryp aldy.
2024-2025 jyldardyń aralyǵynda krematorııdi qaraýyna alatyn vedomstvonyń anyqtalmaýynan ǵımarat taǵy da iske qosylmady.
Keıin nysandy qoǵamdyq densaýlyq saqtaý basqarmasynyń Qalalyq patologoanatomııalyq bıýrosy qabyldap, 2026 jyly ashylatyny belgili boldy.
