Qazaqstandaǵy alǵashqy EKU sábıine 30 jyl: 50 myńnan astam bala dúnıege keldi
ASTANA. KAZINFORM — Qazaqstanda ekstrakorporaldyq uryqtandyrý (EKU) tehnologııasynyń kómegimen dúnıege kelgen balalar sany 50 myńnan asty. Osy tarıhı oqıǵanyń 30 jyldyǵyna oraı Almatyda 25 elden 1000-nan astam maman qatysatyn XVIII halyqaralyq reprodýktıvtik medıtsına kongresi bastaldy. Bul týraly DSM málim etti.
Almaty qalasynda 25 elden kelgen 1000-nan astam mamandy biriktirgen Qazaqstan reprodýktıvtik medıtsına qaýymdastyǵynyń (QRMA) XVIII halyqaralyq kongresi óz jumysyn bastady. Forým elimizde ekstrakorporaldyq uryqtandyrý (EKU) protsedýrasy arqyly dúnıege kelgen alǵashqy balanyń 30 jyldyǵyna arnaldy. Tarıhı oqıǵa 1996 jylǵy 31 shildede bolǵan.
— Qazaqstanda reprodýktıvtik densaýlyqty saqtaý máselesine adam ómiriniń barlyq kezeńinde erekshe nazar aýdarylady. Bul baǵyt otbasyn qoldaýdan, reprodýktıvtik júıe buzylystarynyń aldyn alý men emdeýden, júktilikke deıingi daıyndyqtan bastap, ana men bala densaýlyǵyn saqtaý qyzmetin jetildirýge deıingi sharalardy qamtıdy, — dep atap ótti Densaýlyq saqtaý mınıstri Aqmaral Álnazarova forým qatysýshylaryna joldaǵan quttyqtaý sózinde.
Qabyldanǵan sharalardyń nátıjesinde sońǵy 5 jyldyń ishinde ana óliminiń kórsetkishi 4 ese tómendedi, al náreste ólimi 30%-ǵa azaıdy.
Mınıstrdiń aıtýynsha, Memleket basshysynyń tapsyrmasyna sáıkes EKU baǵdarlamalaryn qarjylandyrý kólemi 7 ese ulǵaıtyldy. 2021–2025 jyldar aralyǵynda «Ańsaǵan sábı» baǵdarlamasynyń sheńberinde shamamen 34 myń áıelge EKU jasaldy. Olardyń 13 myńnan astamy júktilik boıynsha esepke alynyp, nátıjesinde 11 myńnan astam sábı dúnıege keldi.
— Bul tsıfrlardyń artynda ana men áke bolý armanyn júzege asyrǵan myńdaǵan otbasy tur. Bul — birlesken jumysymyzdyń eń mańyzdy nátıjesi. Osyndaı tehnologııalardyń árqaısysynyń artynda kópjyldyq ǵylymı zertteýler, ǵalymdardyń, embrıologtardyń, dárigerler men medıtsına qyzmetkerleriniń qajyrly eńbegi jatyr, — dep atap ótti vedomstvo basshysy.
Kongress baǵdarlamasy praktıkalyq medıtsınanyń ozyq baǵyttaryn qamtıdy. Atap aıtqanda, jasandy ıntellekt elementterin engizý, ımplantatsııaǵa deıingi genetıkalyq skrınıng jáne onkofertıldilik máseleleri talqylanady.
Qazirgi tańda Qazaqstanda osy baǵytta jumys isteıtin 32 beıindi klınıka bar. Olar jyl saıyn qosalqy reprodýktıvtik tehnologııalardyń shamamen 18 myń tsıklin júrgizedi. Elimizde qosalqy reprodýktıvtik tehnologııalardyń kómegimen dúnıege kelgen balalardyń jalpy sany 50 myńnan asty.
Aıta keteıik, Qazaqstanda «Ańsaǵan sábı» baǵdarlamasynyń arqasynda 15 myńǵa jýyq bala dúnıege keldi.
