Qazaqstandaǵy alǵashqy eki AES-ti kim salady — mınıstr
ASTANA. KAZINFORM — Qazaqstanda salynatyn alǵashqy eki atom elektr stantsııasynyń qurylysyna Reseı men Qytaı kompanııalary qatysady. Bul týraly Energetıka mınıstri Erlan Aqkenjenov Úkimette ótken brıfıngte málimdedi.
Mınıstrdiń aıtýynsha, Balqash mańynda salynatyn alǵashqy atom elektr stantsııasynyń qurylysy reseılik «Rosatom» konsortsıýmymen birlesip júzege asyrylady.
Al «Moıynqum» dep atalatyn ekinshi AES boıynsha Qytaıdyń ulttyq ıadrolyq korporatsııasymen yntymaqtastyq máselesi pysyqtalyp jatyr.
— Birinshi «Balqash» AES-i reseılik «Rosatom» konsortsıýmymen júzege asyrylady. Ekinshi «Moıynqum» AES-i boıynsha qazirgi ýaqytta Qytaıdyń ulttyq ıadrolyq korporatsııasymen jumys júrgizilip jatyr, — dedi Erlan Aqkenjenov.
Sonymen qatar mınıstr kelisimniń naqty talaptary men jobanyń ózge de parametrleri áli talqylanyp jatqanyn atap ótti.
— Qazir barlyq másele, onyń ishinde mámileniń talaptary da talqylanyp jatyr. Degenmen jobalardy 2035 jylǵa qaraı aıaqtaýymyz kerek dep esepteımiz, — dedi Energetıka mınıstri.
Aıta keteıik, 2027 jyldyń sońyna deıin ekinshi AES boıynsha kelisimge qol qoıylmaq.
