Qazaqstandaǵy alǵashqy AES-tiń aýqymdy qurylysyn bastaýǵa daıyndyq júrip jatyr — Rosatom basshysy
ALMATY. KAZINFORM – «Rosatom» memlekettik korporatsııasynyń bas dırektory Alekseı Lıhachev Qazaqstandaǵy alǵashqy AES-tiń qurylysy qashan bastalatynyn aıtyp berdi.
Onyń sózinshe, qazirgi ýaqytta bolashaq atom elektr stansasynyń alańynda zertteý jumystary aıaqtalyp keledi. Tehnıkalyq joba ázirlenip, kelisimshart qujattamasy kelisilip jatyr.
— Biz alańdaǵy zertteý jumystary men 12 aı boıy júrgiziletin baqylaýdy aıaqtap, derekterdi jobaǵa engizip jatyrmyz. Tehnıkalyq jobany jasaý jáne kelisimshartty aıaqtaý boıynsha aýqymdy jumys júrip jatyr. Oǵan Vladıvostok qalasynda qol qoıylǵan bolatyn. Qazir naqtylanǵan usynystar tehnıkalyq zerdeleýdi talap etedi, — dedi Alekseı Lıhachev Antalıada ótken «Álemdik atom kúnderi – 2026» halyqaralyq forýmynda.
Korporatsııa basshysy kelesi jyldyń basty mindetteriniń biri - bolashaq AES alańynda aýqymdy jumystarǵa kóshý ekenin atap ótti.
— Qazaqstan Prezıdenti Qasym-Jomart Toqaevqa ýáde etkenimizdeı, bizdiń mindetimiz — kelesi jyly alańǵa shyǵyp, tolyq aýqymdy jumystardy bastaý. Jetkizýshiler, Qazaqstan tarapynan bul jumysty júrgizetin bas merdiger, sondaı-aq osy konsortsıýmnyń halyqaralyq qatysýshylary anyqtalyp qoıdy. Ekinshi kezeńdi daıyndaý boıynsha aýqymdy jumys júrip jatyr, - dep atap ótti Alekseı Lıhachev.
Sondaı-aq ol kelesi jyly qazaqstandyq BAQ ókilderi AES qurylysy josparlanyp otyrǵan Úlken aýylyndaǵy alańǵa bara alady degen úmitin bildirdi.
Eske salaıyq, bıyl qyrkúıek aıynda Vladıvostok qalasynda ótip jatqan XI Shyǵys ekonomıkalyq forýmy aıasynda Qazaqstan Respýblıkasynda atom elektr stantsııasyn jobalaý, jabdyqtaý jáne salý jónindegi kelisimshartqa qol qoıyldy.
Atom energııasy agenttiginiń tóraǵasy Almasadam Sátqalıev Qazaqstanda úshinshi AES salynýy múmkin alańdardy atady. Eldiń shyǵys jáne batys óńirlerimen qatar, soltústik bóligi de qarastyrylyp jatyr.
