Qazaqstandaǵy alǵashqy AES-ke qansha qarajat jumsalady
ASTANA. KAZINFORM — Atom energetıkasy jónindegi agenttik tóraǵasy Almasadam Sátqalıev eldegi alǵashqy AES qurylysyn qarjylandyrýǵa qatysty túsinik berdi.
Aıta keteıik, búgin QR Atom energııasy jónindegi agenttik pen reseılik «Rosatom» arasynda Qazaqstan aýmaǵynda atom elektr stantsııasyn salý jobasy boıynsha yntymaqtastyqtyń negizgi qaǵıdattary men sharttary týraly, sondaı-aq onyń qurylysyn qarjylandyrý úshin memlekettik eksporttyq nesıe berý týraly úkimetaralyq kelisim bekitildi.
— Bul rette uzaq merzimdi nesıe usynylady. Onyń parametrleri Qazaqstan úshin óte qolaıly. Bul másele QR Qarjy mınıstrliginiń quzyrynda, — dedi A. Sátqalıev.
Onyń aıtýynsha, aldyn ala esepteýler eki energobloktyń qurylysyna shamamen 14,4 mlrd dollar qajet ekenin kórsetti. Qaýipsizdik pen áleýmettik ınfraqurylym júıelerine taǵy 2 mlrd dollar baǵyttaý josparlanǵan.
Joba qazirdiń ózinde iske asyrý satysynda tur, ınjenerlik zertteýler júrip jatyr. Alańdaǵy negizgi qurylys jumystary 2027 jyly bastalady dep josparlanǵan.
— Ortasha alǵanda, qurylys 10 jylǵa deıin sozylady. Biraq áriptesterimizben kelise otyryp, birinshi blok 2034 jyly, ıaǵnı birinshi beton quıylǵannan keıin jeti jyldan keıin iske qosylady dep ýaǵdalastyq, — dedi agenttik tóraǵasy.
Budan buryn Qasym-Jomart Toqaev Reseı prezıdentine Balqashta AES salýda batyl qoldaý kórsetkeni úshin alǵys aıtty.
