Qazaqstandaǵy alǵashqy AES-ke ataý berý konkýrsy erteń aıaqtalady

ASTANA. KAZINFORM — 25 qyrkúıek saǵat 12:00–de bastalǵan Qazaqstannyń alǵashqy atom elektr stantsııasyna ataýyn tańdaý boıynsha jalpy halyqtyq konkýrs jalǵasyp jatyr, dep habarlaıdy Atom energııasy jónindegi agenttiginiń baspasóz qyzmeti.

Qatysý óte ońaı. Ol úshin eGov Mobile mobıldi qosymshasyn ashyp, basty bettegi «AES-ke ataý usynyńyz» degen bannerin basyp, qysqasha formany toltyrý qajet.

Odan keıin qatysýshy tildi (qazaq nemese orys tilin) tańdaıdy, óz nusqasyn engizedi jáne qalasa, onyń maǵynasyn qysqasha túsindiredi.

Sońynda konkýrs erejelerimen tanysqanyn rastap, usynysty jiberedi.

— Usynystardy qabyldaý 2025 jylǵy 10 qazan saǵat 23:59–da aıaqtalady. Demek, óz ıdeıańyzdy usynýǵa bir-aq kún qaldy. Konkýrs erejelerimen Qazaqstan Respýblıkasynyń Atom energııasy jónindegi agenttiginiń resmı saıtynda jáne vedomstvonyń áleýmettik jelidegi paraqshalarynda tanysýǵa bolady, — dep atap ótti agenttiktiń baspasóz qyzmeti.

Aıta keteıik, bastamanyń basty maqsaty — bolashaq stantsııanyń tarıhı, mádenı jáne ulttyq mańyzyn beıneleıtin ataýdy tańdaý. Uıymdastyrýshylar elimizdiń barlyq azamattaryn energetıka tarıhyna óz úlesin qosyp, Qazaqstandaǵy alǵashqy AES-ke ataý usynýǵa shaqyrady.

Budan buryn Qazaqstandaǵy tuńǵysh AES ataýyna 20 myńnan asa usynys túskeni anyqtaldy. Bul týraly Jibek Joly arnasynyń «Búgin LIVE» baǵdarlamasyna qonaq bolǵan AES jónindegi sarapshy málimdedi.