Qazaqstandaǵy alǵashqy AES-ke ataý berý baıqaýyna 27 myńnan astam adam qatysty

ASTANA. KAZINFORM — Qazaqstandaǵy alǵashqy AES-ke ataý berý boıynsha konkýrs aıaqtaldy. Bul týraly Atom energııasy jónindegi agenttiginiń baspasóz qyzmeti habarlady. 

Baıqaý 2025 jylǵy 25 qyrkúıekte saǵat 12:00-de eGov Mobile mobıldi qosymshasynda bastalǵan bolatyn. Eki apta ishinde – 10 qazan, saǵat 23:59-ǵa deıin qazaqstandyqtar 27 myńnan astam usynys joldady. Mundaı joǵary belsendilik azamattardyń atom energetıkasyn damytýǵa degen zor qyzyǵýshylyǵyn jáne el úshin mańyzdy jobaǵa jeke úles qosýǵa daıyn ekenin kórsetedi.

Qazirgi ýaqytta kelip túsken usynystardy óńdeý protsesi bastaldy. Alǵashqy kezeńde mamandar barlyq nusqany taldap, júıeleý jumystaryn júrgizedi jáne jıyntyq esep daıyndaıdy. Keıin materıaldar Konkýrs komıssııasynyń músheleri tarapynan qaralady. Qorytyndy kezeńde qazan aıynyń sońynda, komıssııa otyrysy ótkizilip, alǵashqy AES-ke úzdik ataý tańdalady.

Qazaqstan Respýblıkasynyń Atom energııasy jónindegi agenttiginde baıqaý memleket pen azamattyq qoǵam arasyndaǵy ashyq ózara is-qımyldyń úlgisi ári joǵary qoǵamdyq belsendiliktiń kórinisi bolǵany atap ótiledi.

Bolashaq stantsııanyń qorytyndy ataýy komıssııanyń sheshimi boıynsha jarııalanyp, otandyq energetıkany damytýdyń jańa kezeńiniń sımvolyna aınalady.

Buǵan deıin habarlaǵanymyzdaı, Qazaqstannyń batysynda shaǵyn AES salynýy múmkin.