Qazaqstandaǵy áleýmettik tólemder júıesi jańa Konstıtýtsııaǵa saı ózgertildi
ASTANA. KAZINFORM — Eńbek jáne halyqty áleýmettik qorǵaý mınıstrligi birqatar memlekettik járdemaqyny taǵaıyndaý jáne tóleý qaǵıdasyna ózgerister engizý týraly buıryq jobasyn qoǵamdyq talqylaýǵa shyǵardy.
Qujat «Ashyq NQA» portalynda jarııalanǵan. Onda bala týý, bala kútimi, kópbalaly otbasylar boıynsha beriletin járdemaqyny tóleýdiń qaǵıdalaryn ózgertý kózdelgen. Sonymen qatar marapattalǵan analarǵa tólenetin járdemaqy, múgedektigi bar balalardy tárbıelep otyrǵan otbasylarǵa jáne І toptaǵy múgedektigi bar adamdarǵa kútim jasaıtyn azamattarǵa tólenetin tólem de ózgerýi múmkin.
Túsindirme jazbaǵa sáıkes, joba normatıvtik quqyqtyq aktilerdi jańa Konstıtýtsııaǵa sáıkestendirý maqsatynda ázirlengen.
Usynylyp otyrǵan ózgerister tehnıkalyq jáne quqyqtyq sıpatqa ıe. Osy arqyly qoldanystaǵy erejeler jańa konstıtýtsııalyq normaǵa beıimdelmek.
Jobaǵa qatysty qoǵamdyq talqylaý 2026 jylǵy 15 maýsymǵa deıin jalǵasady. Al Memleket basshysynyń 2026 jylǵy 17 naýryzdaǵy №1206 Jarlyǵyna sáıkes memlekettik organdar normatıvtik quqyqtyq aktilerdi 2026 jylǵy 1 shildege deıin jańa Konstıtýtsııa talaptaryna sáıkestendirýi qajet.
Buǵan deıin múmkindigi shekteýli azamattarǵa qyzmet kórsetetin jeke kómekshilerdiń jumys ýaqytyna qatysty jańa talap týraly jazǵan bolatyn.
