Qazaqstandaǵy raqymshylyq: kimderdiń aıyppuly keshirilip, qandaı ister toqtatyldy
ASTANA. KAZINFORM - Memleket basshysynyń bastamasymen táýelsiz Qazaqstan tarıhynda alǵash ret ákimshilik raqymshylyq júrgizilip, ol jańa halyqtyq Konstıtýtsııanyń alǵashqy praktıkalyq júzege asyrylǵan mańyzdy bastamalarynyń birine aınaldy.
Bul týraly búgin óziniń X áleýmettik jelidegi paraqshasyndaa Bas prokýror Berik Asylov jazdy.
- Qasym-Jomart Kemeluly Toqaevtyń azamattarǵa degen qamqorlyǵynyń kórinisi bolǵan bul bastama júzdegen myń adamǵa memlekettiń naqty qoldaýyn sezinýge múmkindik berdi. Bir aıǵa jetpeıtin ýaqyt ishinde 681,7 myń azamatqa qatysty 1,3 mln ákimshilik is boıynsha ákimshilik jazalardy oryndaý toqtatyldy. Jalpy somasy 22,8 mlrd teńgeni quraıtyn aıyppuldar keshirildi. Raqymshylyq ÁQBtK–niń 380-nen astam babyn qamtydy. Onyń ishinde salyq, keden, sanıtarııalyq, ekologııalyq quqyq buzýshylyqtar, kásipkerlik, saýda salasyndaǵy jáne basqa da ákimshilik quqyq buzýshylyqtar bar. Olardyń qatarynda polıtsııa, memlekettik kirister, ekologııa, sanıtarııalyq-epıdemıologııalyq baqylaý jáne ózge de memlekettik organdar anyqtaǵan, ákimshilik qamaqqa alýdy kózdemeıtin ári raqymshylyqqa jatpaıtyn quqyq buzýshylyqtar sanatyna kirmeıtin kóptegen quqyq buzýshylyqtar qamtyldy, - delingen habarlamada.
Sondaı-aq onda prokýratýra organdarynyń tolyq tsıfrlyq daıyndyǵynyń jáne barlyq memlekettik organdardyń úılesimdi jumysynyń arqasynda raqymshylyq bir aıǵa jetpeıtin merzimde iske asyrylǵany aıtylǵan.
Azamattardan eshqandaı ótinish talap etilgen joq, olar memlekettik organdardy aralamady, qujat jınamady jáne ózge de bıýrokratııalyq rásimderden ótpedi. Ákimshilik quqyq buzýshylyq týraly isterdiń toqtatylǵany jóninde azamattar SMS-habarlama arqyly habardar etildi. Kóptegen otbasy úshin bul tek qarjylyq júktemeden bosatý ǵana emes, sondaı-aq atqarýshylyq is júrgizýlerdiń toqtatylýyn, qoıylǵan shekteýlerdiń alynýyn, buryn arnaıy turaqqa qoıylǵan kólik quraldarynyń qaıtarylýyn jáne ómirdi jańa paraqtan bastaý múmkindigin bildirdi.
Azamattar mundaı memlekettik qoldaýǵa rızashylyqtaryn bildirip, onyń tıimdiligine joǵary baǵa berip jatyr. Sonyń bir aıqyn mysaly – Jetisý oblysynyń turǵyny. Onyń avtokóligi jyl basynan beri aıyppuldardyń tólenbeýine baılanysty arnaıy turaqta turǵan. Ákimshilik raqymshylyq týraly zańnyń qoldanylýy nátıjesinde oǵan qatysty ákimshilik quqyq buzýshylyq týraly ister toqtatylyp, polıtsııa avtokóligin ıesine qaıtardy.
Prezıdent bastamasyn iske asyrý barlyq memlekettik organdardan (prokýratýra, ishki ister, memlekettik kirister, ekologııa organdary, jergilikti atqarýshy organdar jáne basqalar) erekshe jaýapkershilikti talap etti. Basty qaǵıda ózgerissiz qaldy: raqymshylyq jasaýǵa quqyǵy bar árbir azamat ony mindetti túrde alýǵa tıis, al zań talaptaryna sáıkes kelmeıtin eshkim bul múmkindikti paıdalanbaýy qajet.
- Atqarylǵan jumys zamanaýı tsıfrlyq tehnologııalardyń memlekettik basqarýdy anaǵurlym tıimdi etip qana qoımaı, azamattardy artyq bıýrokratııalyq rásimderden bosatýǵa qabiletti ekenin kórsetti. Ádildik, qoǵamnyń memleketke degen senimi jáne «Zań men Tártip» qaǵıdaty dál osylaı nyǵaıady, - dep jazdy Berik Asylov.
Osyǵan deıin ІІM raqymshylyq týraly zańnyń júzege asyrylýy jóninde málimet bergen bolatyn.
