Qazaqstandaǵy 153 kásiporyn jumysshylarǵa 719 mln teńgeden astam qaryz
ASTANA. KAZINFORM — Jyl basynan beri memlekettik eńbek ınspektorlary 22,8 myńnan astam jumyskerdiń quqyǵyn qorǵady, dep habarlaıdy QR Eńbek jáne halyqty áleýmettik qorǵaý mınıstrliginiń baspasóz qyzmeti.
2026 jylǵy 1 mamyrdaǵy jaǵdaı boıynsha memlekettik eńbek ınspektorlary respýblıkadaǵy 153 kásiporynda 1,2 myńnan astam jumysker aldynda 719 mln teńgeden asatyn jalaqy bereshegin anyqtady. Sonymen qatar júrgizilgen tekserýler barysynda túrli uıymdarda eńbek quqyqtarynyń 2,7 myńnan astam buzýshylyǵy tirkeldi.
— Jalaqy boıynsha bereshek pen eńbek quqyqtarynyń buzýshylyqtary anyqtalǵan kásiporyn basshylaryna oryndaýǵa mindetti 1 630 nusqama berilip, jalpy somasy 187,4 mln teńgeden asatyn aıyppul salyndy. Qabyldanǵan sharalardyń, onyń ishinde jalaqy bereshegin óteýdiń naqty merzimderi men qatań kestesin belgileýdiń nátıjesinde 859 jumyskerdiń quqyǵy qorǵalyp, olarǵa 535,8 mln teńge tólendi, — delingen mınıstrlik habarlamasynda.
Sonymen qatar QR Eńbek jáne halyqty áleýmettik qorǵaý mınıstrligi eńbek zańnamasynyń saqtalýyna memlekettik baqylaýdy qamtamasyz etý máselelerin erekshe baqylaýda ustap otyr.
2026 jylǵy 1 mamyrdaǵy derekterge sáıkes memlekettik eńbek ınspektorlary 2 446 tekserý júrgizip, onyń barysynda 2 799 quqyq buzýshylyq anyqtady. Onyń ishinde: eńbek qatynastary salasynda — 2 340, eńbek qaýipsizdigi jáne eńbekti qorǵaý boıynsha — 433, halyqty jumyspen qamtý máseleleri boıynsha — 26.
Qabyldanǵan sharalardyń nátıjesinde 21,9 myń jumyskerdiń eńbek quqyǵy qorǵaldy.
Osyǵan deıin Abaı oblysynda prokýratýranyń aralasýymen 185 jumysshyǵa tıesili 15 mln teńge tólengenin jazdyq.
