Qazaqstanda zorlyqshylarmen kúres boıynsha arnaıy bólimshelerdi qurý usynylyp otyr
Vedomstvo baspasóz qyzmetiniń habarlaýynsha, kámelettik jasqa jetpegenderge qatysty jynystyq qylmystardyń sany 2010 jyldan beri eki ese artyp, 2014 jyly 943-ke (2010 jyly - 491) jetken, dep atap ótti L.Asanbaeva. Bıylǵy jyldyń 6 aıynyń qorytyndylary boıynsha osyndaı 726 quqyq buzýshylyq tirkelgen, bul ótken jyldyń osyndaı kezeńimen (485) salystyrǵanda 50 paıyzǵa derlik kóp.
Tekseristerdiń barysynda bul qylmystardy tergeý kezindegi kóptegen buzýshylyqtar anyqtaldy: ótinishterdi qabyldaý jáne tirkeý kezinen bastalatyn áýre-sarsań, tergeýdiń tolyq júrgizilmeýi, olardy jasyrý faktileri de oryn alǵan.
Osyndaı isterdi tergeý kezinde moraldyq-etıkalyq jáne psıhologııalyq aspektiler de esepke alynbaıdy. Bul kóbine olardyń jasyryn sıpatyn baıqatady, sebebi jábirlenýshiler quqyq qorǵaý organdaryna shaǵym bildirgisi kelmeıdi.
Jasalǵan qylmystardy ashýdyń jetkilikti sharalary qabyldanbaıdy, qylmystardy tómen ashýdyń negizgi sebepteriniń biri - bastapqy tergeý sharalaryn sapasyz júrgizý. Osy kemshilikterdiń barlyǵyn vedomstvolyq baqylaý jáne prokýrorlyq qadaǵalaýdy qataıtý jolymen joıý kerek.
Úılestirý keńesinde osy ister boıynsha jábirlenýshilerdi tergeýshilermen emes, psıhologtarmen suralý, nemese suraýdy olardyń mindetti qatysýymen ótkizý máselesin qarastyrý usynyldy.
Sondaı-aq zańnamany osyndaı isterde kishkentaı jastaǵylarǵa ǵana emes, kámelettik jasqa jetpegenderge qatysty qylmys jasaýda taraptardyń bitimgershilikke kelýin toqtatýǵa tyıym salatyndaı ózgertý usynyldy.
