Qazaqstanda zorlyq-zombylyqqa ushyraǵan balalarǵa kómek kórsetý kabınetteri ashylady
ASTANA. KAZINFORM – Memleket basshysy Qasym-Jomart Toqaev bala quqyqtaryn qorǵaý salasyna aýqymdy ózgerister engizetin «Quqyq buzýshylyqtyń aldyn alý týraly» Zańǵa qol qoıdy. Bul týraly Oqý-aǵartý mınıstrliginiń baspasóz qyzmeti habarlady.
Jańa zań kámeletke tolmaǵandar arasyndaǵy jáne olarǵa qarsy jasalatyn quqyq buzýshylyqtardyń aldyn alý tetikterin kúsheıtýge, shuǵyl kómek kórsetý ınfraqurylymyn qalyptastyrýǵa, sondaı-aq óńirlik deńgeıde bala quqyqtaryn qorǵaý júıesin ınstıtýtsıonaldyq turǵydan nyǵaıtýǵa baǵyttalǵan. Qujatta bala quqyqtaryn qorǵaý salasyndaǵy zańnamany buzǵany úshin laýazymdy tulǵalardyń derbes jaýapkershiligin arttyrý normalary da kózdelgen.
Vedomstvo málimetinshe, zań jobasyndaǵy negizgi normalar Qazaqstan Respýblıkasyndaǵy Bala quqyqtary jónindegi ýákilmen jáne depýtattyq korpýspen birlesip ázirlengen.
Zań aıasyndaǵy basty jańashyldyqtardyń biri – elimizde zorlyq-zombylyqtan zardap shekken balalarǵa arnalǵan arnaıy kómek kórsetý kabınetteriniń ashylýy. Bul kabınetterde «bir tereze» qaǵıdaty boıynsha keshendi qoldaý kórsetiledi.
- Atap aıtqanda, balaǵa qolaıly jaǵdaıda alǵashqy psıhologııalyq kómek kórsetý, sot-medıtsınalyq saraptama júrgizý, beıindi mamandardyń qatysýymen saýalnama alý sekildi qyzmetter qarastyrylǵan. Mundaı tásil kámeletke tolmaǵandardyń ártúrli uıymdarǵa birneshe ret júginýin azaıtyp, olardyń qaıta psıhologııalyq jaraqat alý qaýpin tómendetýge baǵyttalǵan.
Sonymen qatar bilim berý uıymdarynda «erekshe nazardy qajet etetin kámeletke tolmaǵandardy pedagogıkalyq súıemeldeý» ınstıtýty engiziledi. Bul shara balalar arasyndaǵy quqyq buzýshylyqtardyń aldyn alýǵa jáne der kezinde kómek kórsetýge múmkindik beredi, - delingen aqparatta.
Zańda sondaı-aq balalardyń quqyqtary men zańdy múddelerin qorǵaýdyń biryńǵaı júıesin qalyptastyrý maqsatynda óńirlik Balalardyń quqyqtaryn qorǵaý basqarmalaryn qurý kózdelgen. Bul qurylymdar úılestirý jumystaryna, aldyn alý sharalaryna, jedel qorǵaýǵa jáne «táýekel tobyndaǵy» balalarǵa qoldaý kórsetýge jaýapty bolady.
Oqý-aǵartý mınıstrliginiń habarlaýynsha, jańa zań normalaryn iske asyrý úshin tıisti qaǵıdalar bekitiledi.