Qazaqstanda Zoom ınternet-alańynyń balamasy jasala ma

NUR-SULTAN. QazAqparat – Qazaqstanda oqýshylardy onlaın rejımde oqytý úshin Zoom ınternet-alańynyń balamasy jasala ma? Bul suraqqa Bilim jáne ǵylym mınıstri Ashat Aımaǵambetov jaýap berdi, dep habarlaıdy QazAqparat tilshisi.

«Jalpy bul baǵytta meniń ustanymym mynadaı: memlekettiń esebinen ınternet-alań bolsyn, basqa da platforma bolsyn qurýǵa qarsymyn. Tájirıbe kórsetip otyrǵandaı, bul istiń arty jaqsy bolmaıdy», - dedi Ashat Aımaǵambetov Bilim jáne ǵylym mınıstrliginiń onlaın formattaǵy tilshilermen kezdesýinde.

Bilim jáne ǵylym mınıstri otandyq bilim berý júıesinde Ulttyq bilim berý derek qory baryn jetkizdi. Onyń ishinde jeke málimetter bar.

«Bul – basty ári memlekettik baza. Ol kezinde qurylǵan. Sony paıdalanyp, damytamyz. Kundelik, Daryn online, Bilimland sekildi kóptegen júıeni memlekettik júıemen aýystyrýdyń menińshe qajettigi joq. Men naryqqa kóbirek senemin. Básekelestik bolýy kerek», - dedi Ashat Aımaǵambetov.