Qazaqstanda zııandy genetıkalyq modıfıkatsııalanǵan ónimderden saqtandyratyn zań qajet - dóńgelek ústel otyrysy

Búgin «Nazarbaev ýnıversıtetinde» «Gendik-ınjenerlik qyzmetti retteý týraly» zań jobasyna baılanysty ótken dóńgelek ústel otyrysynda májilis depýtaty Darıǵa Nazarbaeva osylaı dedi. 

Onyń sózine qaraǵanda, 1996 jyly genetıkalyq modıfıkatsııalanǵan ónimder óndirile bastaǵannan keıin elimizde túrli aýrý-syrqaýlar paıda boldy. Al AQSh-ta 3 nemese odan da kóp sozylmaly syrqatqa shaldyqqandar nebári 9 jylda 7 paıyzdan 15 paıyzǵa deıin ósti. Sonymen qatar, aýtızm, reprodýktıvti aýytqýlar, asqorytýmen baılanysty problemalar sııaqty azyq-túlik ónimderinen bolatyn allergııalar kúrt ósti. 

«Bizdiń elimizge sońǵy jyldary quramynda gendik modıfıkatsııalanǵan ónimderi bar azyq-túlik pen taǵam ónimderi kele bastady jáne bul úderis ýaqyt ótken saıyn údep keledi. Al elimiz Dúnıejúzilik saýda uıymyna kirgennen keıin bul úderis tipten arta túsedi. Sondyqtan da elimizdiń zańnamalarynda gendik modıfıkatsııalanǵan ónimderdi olardyń qaýipsiz ekeni rastalǵannan keıin ǵana aınalymǵa jiberýge bolatyny jóninde birqatar talaptardyń bar ekendigine qaramastan, mundaı ónimder elimizde tolyq baqylanbaıdy. Jalpy bizdiń zańdarymyzda gendi modıfıkatsııalanǵan ónimderdiń aınalymyn baqylaıtyn tıimdi tetikter joqtyń qasy. Sondyqtan bizge mundaı zań qazir asa qajet. Mundaı zańdar bolýy kerek jáne ol tutynýshynyń qaýipsizdigin qamtamasyz etip, bir jaǵynan gendik-ınjenerlik qyzmetti jetildirýge yqpal ete alýy tıis», - dedi depýtat. 

Onyń pikirinshe, elde genetıkalyq modıfıkatsııalanǵan ónimderdiń qaýipsizdigin táýelsiz saraptaıtyn, olardyń arnaıy belgimen mórlenip, osy baǵyttaǵy zań talaptarynyń qatań túrde oryndalýyn, azyq-túlik naryǵyndaǵy aınalymyn baqylaýdy qamtamasyz etetin tetikter qajet.  

Dóńgelek ústel barysynda qatysýshylar osy másele tóńireginde ózara pikir almasty.