Qazaqstanda jylyjaı salý qymbat - kásipker
ALMATY. QazAqparat - Almatyda «Saýda, kólik jáne jemis-kókenis sektorynyń ósý keleshegi» taqyrybynda 7-shi Ortalyq Azııa saýda forýmy ótip jatyr, dep habarlaıdy QazAqparat tilshisi.
Forýmǵa Ortalyq Azııa elderi saýda ókilderimen qatar, Eýropadaǵy 18 elden túrli kompanııa basshylary men memlekettik sektor ókilderi keldi. Jıynǵa barlyǵy 500 qatysýshy shaqyrylǵan.
Eki kúndik saýda forýmy bıyl «Saýda, kólik jáne jemis-kókenis sektorynyń ósý keleshegi» taqyrybyn talqylamaq. Taqyryp aıasynda Ortalyq Azııa aımaǵynda jańa jumys oryndaryn qurý maqsatynda kompanııalardyń básekege qabilettigin arttyrý máselesi kóterildi.
Forýmdy uıymdastyrýǵa muryndyq bolǵan - Qazaqstandaǵy AQSh elshiligi. AQSh-tyń elimizdegi elshisi Djordj Kroll forým jańadan qurylǵan bıznestiń ósýine septigin tıgizetinin atap ótti.
«Satýshylardyń, satyp alýshylardyń jáne saýda deldaldarynyń basyn qosatyn Ortalyq Azııa saýda forýmy jańadan qurylǵan bıznestiń ósýine, al qyzmetin burynnan júrgizip otyrǵan kásiporyndardyń keńeıýine kómektesý úshin iskerlik baılanystardy ornatýǵa arnalǵan alańdy usynyp otyr», - dedi AQSh Elshisi.
Jıynda Ortalyq Azııa elderinen eksporttalatyn jemis pen kókónis kólemin arttyrý, aımaqtaǵy saýda jáne onyń ekonomıkalyq damýyna bóget bolyp otyrǵan tasymaldaý jáne logıstıkadaǵy keleli máseleler kóterildi. Forýmda baıandama jasaǵan belgili kásipker Raıymbek Batalov shaǵyn jáne orta bıznestiń jylyjaı salasyna ınvestıtsııa salýyna jaǵdaı jasaý qajettigin kóterdi.
«Qazaqstanda aýyl sharýashylyǵyna ınvestıtsııa salý ókinishke oraı qymbat. Qys mezgilindegi jemis-jıdek, kókenis týraly aıtatyn bolsaq, bul jerde jylyjaılarǵa toqtalý qajet bolady. Jylyjaı salý ınvestıtsııanyń kóz qarasymen qarasa, óte qymbat. Bul jerde naryqty arzan taýarmen toltyrý týraly aıtýǵa áli erte. Mysaly, siz ushaqpen Qytaıǵa qaraı ushsańyz, Qazaqstan aýmaǵynan ushqanda árıne, ásem tabıǵatty kóresiz, al Qytaı shekarasyna asqanda qaptaǵan jylyjaılardy baıqar edińiz. Eger Qytaıda, Ózbekstanda jáne Qazaqstanda jylyjaı salý qanshalyqty dep baǵalaryn salystyryp qaraıtyn bolsańyz, Qazaqstanda aıtarlyqtaı qymbat ekenine kózińiz jetedi. Bul jerde memlekettik qoldaý qajet ekenin taǵy da aıta ketkim keledi. Menińshe, bul baǵytta jumystar júrgizilip jatyr. Degenmen, orta jáne shaǵyn bıznestiń osy salaǵa kirýine jaǵdaı jasaý mańyzdy», - dedi jıynda basty baıandama jasaǵandardyń biri «Raıymbek» holdıngi dırektorlar keńesiniń tóraǵasy Raıymbek Batalov.
Aıta keteıik, forým aıasynda kórme uıymdastyrylyp, óndiris, kólik shyǵyndaryn tómendetýge múmkindik beretin jemis-jıdek, kókenis, kólik jáne logıstıka salasyndaǵy jańa tehnologııalar, jabdyqtar men qyzmetter tanystyryldy. Sondaı-aq, eki kúndik forým aıasynda aımaqtyq jáne halyqaralyq saýdadaǵy asa mańyzdy máselelerdi sheshý jóninde memleket pen jekemenshik sektor arasynda dıalogty ornatý máselesi jáne azyq-túlik qaýipsizdigi taqyrybyna arnalǵan bızness-trenıngter uıymdastyrylmaq.
