Qazaqstanda jylyna shamamen 18-20 myń stýdent zańger mamandyǵyn alyp shyǵady - depýtat N. Týretskıı
ASTANA. 13 jeltoqsan. QazAqparat /Jasulan Amanbaıuly/ - Qazaqstanda zańgerlerdi daıarlaıtyn 36 joǵary oqý orny bar. Olar jylyna shamamen 18 myńnan 20 myńǵa deıin maman oqytyp shyǵarady.
Bul týraly búgin Astanada «Quqyqtyq saıasat tujyrymdamasy sheńberinde Qazaqstanda quqyqtyq mádenıetti qalyptastyrý problemalary men bolashaǵy» degen atpen ótken respýblıkalyq konferentsııada QR Parlamenti Májilisiniń depýtaty Nıkolaı Týretskıı málim etti.
«Men Bilim jáne ǵylym mınıstrligine elde zańgerlerdi daıarlaıtyn qansha JOO bar dep suraý saldym. Ondaı oqý oryndarynyń sany 36-ǵa jetipti. Mınıstrliktiń málimetinshe, olar jylyna shamamen 18-20 myń zańger oqytyp shyǵarady», - deıdi N. Týretskıı.
Degenmen oqytýdyń san jaǵy kemshin tartpaıtyndyǵyn aıtyp qalǵan depýtat, olardyń sapasyna kelgende irkilip qaldy.
«Praktıkaǵa kelgen stýdentterdiń kóbi memlekettik bılik júıesiniń eń basty: zań shyǵarýshy, atqarýshy, sot bılik tarmaqtarynyń negizgi pozıtsııalaryn bilmeıtindikterin, qaı organ qandaı jumyspen aınalysatyndyǵy jóninde habarsyz ekendikterin kórsetip aldy. Bul zańger mamandaryn oqytý sapasy tómen degendi bildiredi. Zańger dıplomy naǵyz dıplom bolýy úshin, JOO-ny bitirgen bizdiń zańgerlerdi qaıtadan biliktilikterin arttyrýǵa jiberýge májbúr bolamyz», - deıdi depýtat.
Onyń aıtýynsha, eldegi zańgerdiń kásibı biliktiligi jónindegi suraqtar týyndamas úshin bilim berý úderisin ońtaılandyrý ǵana emes, sonymen qatar zańger mamandyǵynyń bedeli men abyroıyn joǵarylatý boıynsha sharalar qoldaný qajet.
