Qazaqstanda jylyna shamamen 150 myńdaı adam ár túrli psıhıkalyq aýrýlarǵa shaldyǵady - G. Hákimjanova
ALMATY. QazAqparat - Qazaqstanda jylyna shamamen 150 myńdaı adam ár túrli psıhıkalyq aýrýlarǵa shaldyǵady. Bul týraly búgin Almatyda ótken baspasóz máslıhaty barysynda «Áleýmettik jumysshylar, múgedekter jáne eriktiler qaýymdastyǵy» QB tóraıymy Gúlnur Hákimjanova málimdedi.
Onyń aıtýynsha, psıhıkalyq aýrýlarǵa shaldyqqandardyń barlyǵy birdeı múgedektik rásimdeı bermeıdi.
«Psıhıkalyq aýrýlarǵa shaldyqqandardyń keıbiri emdelip, aıyǵyp ketedi. Al, elimizde aqyl-esi kem jáne psıhıkalyq aýrýlarǵa shaldyqqan jáne múgedektik rásimdegen adamdardyń sany - 200 myńnan asady. Aqyl-oıy mesheý tulǵalardyń sany 100 myń turǵynǵa shaqqanda 448,1-ge jetti. Psıhıkalyq densaýlyǵynda jiti buzylystar týyndaǵan jaǵdaıda mamandandyrylǵan medıtsınalyq kómek 35 psıhıkalyq densaýlyq ortalyǵynda kórsetiledi, onda 10 myń tósek oryn qarastyrylǵan. Sonymen qatar, 53 medıtsınalyq-áleýmettik mekemede - jabyq ınternatta 18 myńǵa jýyq adam oqshaý ómir súrýde», - dedi G. Hákimjanova.
Sonymen qatar, onyń aıtýynsha, elimizde psıhıkalyq aýrýlarǵa shaldyqqan jáne aqyl-oıynda buzylystary bar tulǵalarǵa kórsetiletin áleýmettik qyzmetter olardyń turatyn jerinde damymaǵan, aýyl turǵyndary mundaı qyzmetke qol jetkize almaı otyr.
«Osy máseleni sheshý maqsatynda «Kúndizgi jumyspen qamtý qyzmetiniń standarty» jáne «Zańnamaǵa engiziletin tolyqtyrýlar men ózgeristerdiń salystyrmaly kestesi» jobasy ázirlendi. Bul tolyqtyrýlar men ózgeristerdi aldaǵy ýaqytta Úkimet arqyly tıisti zańdarǵa engizýge kúsh salamyz. Basty maqsat - psıhıkalyq aýrýlarǵa shaldyqqan jáne aqyl-oıynda buzylystary bar tulǵalardyń eńbekke degen quqyǵyn qorǵaý, olarǵa belgili bir mamandyqtardy ıgerýge múmkindik berý, - dedi G. Hákimjanova.
