Qazaqstanda jylyna 600 bala onkologııalyq dertke shaldyǵady

ALMATY. QazAqparat - Elde jyl saıyn 600-ge jýyq bala onkologııalyq aýrýǵa shaldyǵady. 2021 jyly bul qorqynyshty dıagnoz 591 balaǵa qoıyldy, dep habarlaıdy QazAqparat tilshisi.

Qazaq onkologııa jáne radıologııa ǵylymı-zertteý ınstıtýtynyń basshysy Dılıara Qaıdarovanyń aıtýynsha, qaterli isikke shaldyqqan balalardyń 40 paıyzyna leıkoz (aq qan aýrýy) dıagnozy qoıylady.

Sonymen qatar, balalar onkologııasynyń jalpy qurylymynda mı isikteri, neıroblastomalar, lımfomalar jáne retınoblastomalar basym.

Qazaq onkologııa jáne radıologııa ǵylymı-zertteý ınstıtýtynyń balalar onkologııa ortalyǵynda jylyna 200-ge deıin bala emdeledi.

«QazǴZI balalar onkologııasy ortalyǵy 20 balaǵa arnalǵan. Zamanaýı qural-jabdyqtardyń arqasynda bizdiń ortalyqta balalarǵa naqty dıagnostıka jasalyp, sáýleli jáne hımııalyq emdeý sharalary jasalady. Atap aıtqanda, pozıtrondy-emıssııalyq tomografııa, sáýlelendirý apparaty álemde 8 elde ǵana bar. Tomototerapııa arnaıy balalarǵa arnalǵan. Emdeý sharalarynyń barlyq túri balalar úshin tegin»,- deıdi Qazaq onkologııa jáne radıologııa ǴZI AQ basqarma tóraıymy Dılıara Qaıdarova.

Onyń aıtýynsha, baladaǵy onkologııalyq aýrýdy anyqtaý óte qıyn. Sondyqtan ata-analar balalarynyń densaýlyǵyna óte muqııat bolýy kerek.

Qaterli isik terapııasynyń tıimdiligi ýaqtyly dıagnozǵa baılanysty ekenin este ustaǵan jón.

«Búırek isigin ýltradybystyq zertteý (ÝDZ) arqyly anyqtaýǵa bolady. Endi árbir bala aı saıyn emhanada skrınıngten ótýi kerek. Bul skrınıngter aýrýdy erte kezeńde anyqtaýǵa múmkindik beredi. Áıel ózin kútýi kerek, júktilik kezinde mindetti túrde ýltradybystyq zertteý skrınınginen ótýi kerek», - dep atap ótti onkolog.

Aıta keteıik, 15 aqpan – halyqaralyq rak dertine shaldyqqan balalar kúni retinde atalyp ótiledi.