Qazaqstanda jylyna 40 myńǵa jýyq adam ınsýltqa shaldyǵady
ASTANA. QazAqparat - Qazaqstanda jylyna 40 myńǵa jýyq adam ınsýltqa shaldyǵady. Bul týraly búgin Úkimet otyrysynda Respýblıkalyq Neırohırýrgııa ǵylymı ortalyǵynyń basqarma tóraǵasy Serik Aqsholaqov málim etti.
Onyń aıtýynsha, qazirgi kúni keń taraǵan qaýipti dertterdiń biri - ınsýlt bolyp otyr. Jyl saıyn dúnıejúzinde bul dertke shamamen 15 mıllıon adam ushyraıdy. Sonyń 3-5 mıllıony ómirden ozady.
«Qazaqstanda jylyna 40 myńǵa jýyq adam osy ınsýltqa shaldyǵady. Sondyqtan osy máselege erekshe kóńil bóle otyryp, respýblıkalyq ınsýlt máseleleri jónindegi úılestirý ortalyǵyn ashtyq. Respýblıkadaǵy ınsýlt qyzmetin damytý tujyrymdamasyn ázirledik. Qazaqstannyń barlyq óńirlerinde 35 ınsýlt ortalyǵy ashyldy. Onyń 19-y - joǵary sapaǵa sáıkes keledi. Tıisti jumysty qamtamasyz etý úshin mamandardy daıyndaý júrgizilýde. 2016 jylǵy 8 aıdyń qorytyndysy boıynsha, ınsýltten bolatyn ólim-jitim deńgeıi 2015 jylǵy tıisti kezeńmen salystyrǵanda, 21 paıyzǵa tómendedi. Al osy patologııa kezindegi neırohırýrgııalyq operatsııalardyń sany aıtarlyqtaı artty», - dep atap ótti ol.
S. Aqsholaqovtyń jalpy bul derttiń aldyn alýǵa úlken kóńil bólinip kele jatqandyǵyna toqtaldy.
«Búkilálemdik densaýlyq saqtaý uıymynyń málimetterine sáıkes, 10 ınsýlttiń 8-iniń aldyn alýǵa bolady. Sondyqtan biz aldyn alý sharalaryn kúsheıtýdi qolǵa alýdy josparlap otyrmyz. Bastamasy retinde bıyl alǵashqy ret Qazaqstan jyl saıyn 29 qazanda ótetin búkilálemdik ınsýltpen kúres kúnine qatystyq. Bul kúni ınsýlttiń alǵashqy belgilerin tanystyrý arqyly ýaqtyly dıagnostıka jasaýǵa jáne kómek kórsetýge múmkindik beretin konsýltatsııalar júrgizildi. Bul jumysty ári qaraı jalǵastyramyz», - dedi ortalyq basshysy.
Jalpy atalmysh ortalyq 8 jyl ishinde Ortalyq Azııada jáne Qazaqstanda buryn qoldanylmaǵan 60-tan astam tehnologııalardy engizgen. Ortalyqta 30 myńǵa jýyq naýqas emdelip, 15 myńǵa jýyq operatsııa jasaldy. Sonyń 70 paıyzynda jańa tehnologııalar qoldanylǵan.
Bas-mı tamyrlarynyń patologııasy, Parkınson aýrýy, epılepsııa, bas-mıynyń jáne julyn isikteri bar naýqastarǵa joǵary tehnologııalyq kómek kórsetý qolǵa alyndy.
«Bizdiń ortalyqtyń ashylýyna deıin naýqastardyń shetelge baryp, emdelýine nemese osy keseldiń aýyrtpashylyǵyna kónýge týra keletin edi. Álemde alǵashqylardyń biri bolyp, 2008 jyly bas-mı isigin alyp tastaý, balany ishten jaryp alý otalary bir ýaqytta júrgizile otyryp, ana men balanyń ómirin saqtap qalatyn sımýltandyq operatsııany jasadyq. Mundaı operatsııa ómirde óte sırek kezdesedi. Bıyl da osyndaı operatsııany jasadyq. Qazirgi tańda osy analar men balalardyń jaǵdaılary jaqsy», - dep túıdi sózin S. Aqsholaqov.
Ortalyq turaqty túrde medıtsınalyq tehnologııalardy respýblıkanyń óńirlerine transfertteýdi júzege asyrady. Sol arqyly qazirgi kezde óńirlerde 1 myńnan astam naýqasty emdeýge múmkindik beretin 50-den astam tehnologııalar engizildi.
