Qazaqstanda jylyna 1 mln tonna polıetılen shyǵaratyn óndiris oshaǵy qurylady

NUR-SULTAN. QazAqparat – QR Energetıka mınıstri Bolat Aqsholaqov Májiliste ótken Úkimet saǵatynda jylyna 1 mln tonna polıetılen shyǵaratyn óndiris oshaǵy qurylatynyn málim etti, dep habarlaıdy QazAqparat tilshisi.

«Munaı jáne gaz óndirýshi elderdiń ekonomıkasyn ártaraptandyrý munaı-hımııa ónerkásibin qurýǵa tikeleı baılanysty. Sol arqyly qosylǵan qun tizbegin uzartý álemdik úrdiske aınalyp otyr.

Munaı-gaz-hımııa bóliginde búginde maılaý materıaldary, polıpropılen, metıl-tret-býtıl efıri, benzol jáne paraksılol óndirilýde.

2021 jyly Shymkent qalasynda qýaty 57 myń tonna oktan kúsheıtkish qospalaryn óndirý zaýyty iske qosyldy. Sondaı-aq, Atyraý oblysyndaǵy arnaıy ekonomıkalyq aımaqtyń ınfraqurylymdyq nysandary tolyǵymen iske qosyldy»,- dedi vedomstvo basshysy.

Mınıstrdiń aıtýynsha, bul baǵytta taǵy birneshe joba qolǵa alynbaq.

«Sonymen qatar, jylyna shamamen 1 mln tonna polıetılen shyǵaratyn, jylyna 1,25 mln tonna polıetılen tereftalat pen tereftalat qyshqylyn óndiretin jáne jylyna 186 myń tonna býtadıen óndiretin kásiporyndar qurý jobalary josparda bar»,- dedi Bolat Aqsholaqov.

Sondaı-aq, Bolat Aqsholaqov 180 kún ótken soń suıytylǵan gaz baǵasyn qalaı retteıtinin aıtty.