Qazaqstanda «Jylýmen jabdyqtaý týraly» zań ázirlenip jatyr
Tujyrymdama jobasy «Atameken» UKP-da, zańdy tulǵalar birlestiginde talqylaýǵa joldanǵan, normatıvtik quqyqtyq aktilerdiń ashyq portalynda jáne Energetıka mınıstrliginiń resmı saıtynda ornalastyrylǵan.
Búginde Qazaqstanda jylý energetıkasy salasyn retteıtin biryńǵaı salalyq zań joq. Sala máseleleri «Elektr energetıkasy týraly» zańda ishinara kórsetilgen, biraq barlyq qajetti aspektilerdi qamtymaıdy.
Jylýmen jabdyqtaý salasyndaǵy negizgi problemalardyń biri-negizgi jabdyqtyń joǵary tozýy (orta eseppen 59% deńgeıinde) jáne jabdyqtyń paıdaly áser koeffıtsıentiniń tómen bolýy (orta eseppen 35-50%).
Sonymen qatar, jylýmen jabdyqtaý salasyndaǵy memlekettik organdardyń ókilettikterin aıqyndaý qajet. Salany memlekettik retteýdi birneshe memlekettik organ júzege asyrady: Energetıka mınıstrligi - energııa óndirý salasyndaǵy saıasatty, Indýstrııa jáne ınfraqurylymdyq damý mınıstrligi – jylý energııasyn berý jáne tutyný salasyndaǵy saıasatty, Ulttyq ekonomıka mınıstrligi – tarıf belgileýdi. Bul rette, Qazaqstanda jylý energetıkasy salasynda memlekettik baqylaý men qadaǵalaý qarastyrylmaǵan.
Jylýmen jabdyqtaý salasyna ınvestıtsııalar tartý tetigin engizý talap etiledi. Tabıǵı monopolııalar sýbektileriniń (energııa óndirýshi jáne energııa berýshi uıymdardyń) tarıfteri jylý energııasyn óndirýge jáne berýge naqty shyǵyndardy jappaıdy, bul salanyń ınvestıtsııalyq tartymdylyǵyna keri áser etedi.
Qujat Qazaqstan Úkimetiniń zań jobalaý jumystarynyń 2022 jylǵa arnalǵan josparyna engiziletin bolady.
