Qazaqstanda jylqy etiniń baǵasy bir jylda 16,5 paıyzǵa qymbattaǵan

NUR-SULTAN. QazAqparat – Bıylǵy jartyjyldyqta sharýashylyqtarda soıylǵan jáne soıýǵa ótkizilgen jylqy etiniń kólemi - 125 myń tonnaǵa jetti. Bul ótken jyldyń sáıkes kezeńimen salystyrǵanda 6,2 paıyzǵa kóp, dep habarlaıdy QazAqparat tilshisi Energyprom resýrsyna silteme jasap.

6 aı ishinde eń kóp jylqy Túrkistan oblysynda soıylǵan. Bul óńirde soıylǵan maldyń taza etiniń salmaǵy 7,5 myń tonnany quraǵan. Kóshbasshylar úshtigine Abaı (soıylǵannan keıingi et salmaǵy - 7,1 myń tonna) jáne Aqtóbe (soıylǵannan keıingi et salmaǵy - 5,5 myń tonna) oblystary da kirdi.

1 shildedegi aqparat boıynsha elimizde 4,1 mln bas jylqy bar. Bul ótken jylmen salystyrǵanda 10,6 paıyzǵa kóp. Atalǵan mal basy kóp óńirler - Túrkistan, Qaraǵandy jáne Abaı oblystary.

Shilde aıynda eldiń bazarlary men dúkenderinde jylqy etiniń kelisi 2 900 teńgeden saýdalandy. Al, ótken jyly et baǵasy 16,5 paıyzǵa tómen bolǵan edi.

Baǵa sharyqtaǵan aımaqtar qataryn Soltústik Qazaqstan oblysy bastap tur. Munda jylqy etiniń quny 28,8 paıyzǵa ósken. Sonymen qatar, Aqtóbe oblysy men Shymkent qalasynda da baǵa kóterilgen. Eń tómengi jyldyq ósim Qyzylorda oblysynda tirkeldi. Onda jylqy eti 4,5 paıyzǵa qymbattaǵan.