Qazaqstanda jyldyń basynan beri zańsyz aınalymnan 29 tonnadaı esirtki alyndy
BRıÝSSELЬ. 15 jeltoqsan. QazAqparat /Dımash Syzdyqov/ - Aǵymdaǵy jyldyń 11 aıynda Qazaqstanda zańsyz aınalymnan 29 tonnaǵa jýyq esirtki tárkilengen, onyń 210 kelisi- geroın. Olardyń quny «qara bazardyń» narqy boıynsha 3,2 mıllıardtan astam teńgeni qurap otyr.
Brıýsseldegi NATO-nyń shtab-páterinde ótken Ortalyq Azııa memleketteriniń esirtkiniń zańsyz aınalymymen kúres salasyndaǵy quqyq qorǵaý organdary qyzmetkerleriniń úılestirý kezdesýinde Qazaqstannyń ІІM Esirtki bıznesimen kúres jáne esirtkiniń zańsyz aınalymyn baqylaý komıtetiniń tóraǵasy Janat Súleımenov osyndaı málimetterdi jarııa etti.
«Elimizdiń quqyq qorǵaý organdary 2010 jyldyń 11 aıynda 8300-den astam esirtki qylmysyn anyqtady, onyń ishinde, 2500 fakti - esirtki satýmen, 22 fakti - esirtki kontrabandasymen baılanysty. Іshki ister organdarynyń esirtki bıznesimen kúres bólimderi aǵymdaǵy jyly sondaı-aq 9 uıymdasqan qylmystyq toptyń jáne esirtki trafıginiń 108 arnasynyń kózin joıdy», - dedi J.Súleımenov.
Oǵan qosa, komıtet tóraǵasynyń aıtýynsha, 2008 jyly asa aýyr esirtki qylmystary úshin sanktsııalar qataıtylǵannan keıin 100-den astam qylmysker - 12 men 15 jyldyń aralyǵyndaǵy merzimge, 9 adam - 20 jyldan joǵary merzimge, bir narkodıler - ómir boıǵy jazaǵa kesilgen.
