Qazaqstanda jyldyq ınflıatsııa 16% asyp ketti

NUR-SULTAN. QazAqparat –QR Premer-Mınıstri Álıhan Smaıylov Úkimet otyrysynda ınflıatsııanyń artqanyna alańdaýshylyq bildirdi, dep habarlaıdy QazAqparat tilshisi.

«8 aıdyń qorytyndysy boıynsha barlyq negizgi kórsetkishter Aqmola, Qaraǵandy, Qostanaı oblystary men Shymkent qalasynda ósip otyr. Barlyq ákimdikter óńir ekonomıkasynyń ósý qarqynyn tómendetpeýi kerek. Sonymen qatar tamyz aıynyń qorytyndysy boıynsha elimizde jyldyq ınflıatsııa 16%-dan asyp ketti», - degen Úkimet basshysy búkil jaýapty basshylarǵa baǵany turaqtandyrý jumysyn únemi baqylaýda ustaýdy tapsyrdy.

«Óńir ákimdikteri memlekettik organdarmen birlesip, áleýmettik mańyzy bar azyq-túlik taýarlarynyń baǵalaryn turaqtandyrý, azyq-túlik ónimderi óndirisin yntalandyrý jáne ishki naryqty tolyqtyrý boıynsha jumystardy kúsheıtý qajet»,- dedi Premer-Mınıstr.