Qazaqstanda jyldyq deklaratsııalardy tapsyrý merzimi uzardy

NUR-SULTAN. QazAqparat – Elde tótenshe jaǵdaıdyń jarııalanýyna baılanysty jyldyq deklaratsııalardy tapsyrý merzimi uzartyldy. Bul týraly QR Qarjy mınıstrligi Memlekettik kirister komıtetinen málim boldy, dep habarlaıdy QazAqparat.

«Elimizde tótenshe jaǵdaıdyń engizilýine baılanysty zańdy jáne jeke tulǵalarǵa deklaratsııa tapsyrý merzimi tótenshe jaǵdaıdyń ýaqytyna sáıkes kelgendikten, ol 30 kúntizbelik kúnge, ıaǵnı 2020 jyldyń 30 sáýirine deıin uzartylady. Alaıda, ol úshin salyq eseptiligi nysandaryn elektrondy túrde tapsyrý qajet. Osylaısha, 2020 jyldyń 30 sáýirine deıin tapsyrylǵan elektrondy deklaratsııalar ýaqytynda tapsyrylǵan bolyp sanalady», - delingen habarlamada.

Bul uzartýlar kelesi salyq eseptiliginiń nysandaryna qatysty qoldanylady:

1) korporatıvtik tabys salyǵy boıynsha deklaratsııa (100.00, 110.00, 150.00, 180.00 nysandar);

2) jeke tabys salyǵy boıynsha deklaratsııa (220.00, 240.00 nysandar);

3) jeke tabys salyǵy jáne múlik boıynsha deklaratsııa (230.00 nysan);

4) kólik quraldary salyǵy, jer salyǵy jáne múlik salyǵy boıynsha deklaratsııa (700.00 nysan);

5) qorshaǵan ortaǵa emıssııa úshin tólemaqy boıynsha deklaratsııa (870.00 nysan);

6) jalǵa berý (paıdalaný) sharttarynyń tizilimi (871.00 nysan);

7) tirkelgen shegerim paıdalanylatyn arnaýly salyq rejımin qoldanatyn salyq tóleýshiler úshin deklaratsııa (912.00 nysan);

8) biryńǵaı jer salyǵyn tóleýshilerge arnalǵan deklaratsııa (920.00 nysan).