Qazaqstanda jyl sońyna deıin 4,4 myń km avtojol qaıta jańartylady

NUR-SULTAN. QazAqparat - «Nurly jol» memlekettik baǵdarlamasyn iske asyrý bastalǵannan beri avtojol salasynda 2,4 myń km respýblıkalyq mańyzy bar avtojol salyndy jáne qaıta jańartyldy, dep habarlaıdy QazAqparat QR Indýstrııa jáne ınfraqurylymdyq damý mınıstrliginiń baspasóz qyzmetine silteme jasap.

«2019 jyly Qaraǵandydan Almatyǵa deıin jáne Aqtóbeden Reseı Federatsııasynyń shekarasyna deıin (Astrahan qalasyna) qurylys jumystary bastaldy. Jyl qorytyndysy boıynsha 641 km qaıta jańartylǵan jolda qozǵalys ashý josparlanǵan. Nur-Sultan-Pavlodar (441 km), Şýchınsk-Zerendi (80 km), Beıneý-Aqjigit (85 km), Taskesken-Baqty (20 km), Jetibaı-Jańaózen (73 km) jobalary boıynsha jumystar tolyq aıaqtalady», - dep habarlady QR IIDM basshysy Roman Sklıar Qazaqstan halqymen esepti kezdesýinde.

Onyń málimetinshe, respýblıkalyq mańyzy bar avtojoldardyń 1,5 myń shaqyrymyn jóndeýmen qamtý kózdelgen. Avtomobıl joldaryn normatıvtik kútip ustaý men saqtaýdy qamtamasyz etý maqsatynda jol júrý úshin aqy alý júıesin engizý jónindegi jobalardy iske asyrý jalǵasýda. Bıylǵy jyldyń basynda jalpy uzyndyǵy 471 km bolatyn Almaty-Qorǵas (295 km), Almaty-Qapshaǵaı (42 km) jáne Astana-Temirtaý (134 km) jol ýchaskelerinde tólem jınaý bastaldy. Tutastaı alǵanda, 2019 jyldyń qorytyndysy boıynsha aqyly ýchaskelerden (4 ýchaske) jınalatynjyl saıynǵy alym (osy avtojoldardy kútip ustaýǵa arnalǵan qarjylandyrýdyń normatıvtik qajettiligi 3,2 mlrd. teńge bolǵanda)shamamen 5,4 mlrd.teńgeni quraıdy.

Kelesi jyly taǵy 5,5 myń shaqyrymǵa aqy alý júıesin iske qosý josparlanýda, bul avtomobıl joldaryn kútip ustaýǵa jumsalatyn shyǵyndardy edáýir qysqartýǵa múmkindik beredi.

«Nursultan Nazarbaevtyń óńiraralyq ınfraqurylymdy júıeli damytý jónindegi tapsyrmasyn oryndaý maqsatynda 2018 jyly jergilikti jeliniń avtojoldaryn qarjylandyrý tepe-teń negizde 156 mlrd. teńgege deıin jetkendikten, 4 myń km. astam joldy jóndeýge múmkindik berdi. Aǵymdaǵy jyldan bastap biz qymbat kúrdeli jobalardan negizinen sýyq resaıklıng ádisi arqyly únemdi bolatyn ortasha jóndeýge kóshemiz. 2019 jyldan bastap jergilikti jol jelisin jóndeýge qarjylandyrý kólemi 200 mlrd. teńgeni quraıdy, bul 5 myń km astam jóndeý jumystarymen qamtýǵa múmkindik beredi», - dep atap ótti Roman Sklıar.

3 jyldyq kezeńde jergilikti joldardy qarjylandyrýdyń jyl saıynǵy kólemi jylyna 5 myń km deıin jóndeý jumystaryn qamtı otyryp, 200 mlrd.teńgeden kem emes deńgeıde saqtalatyn bolady. Mundaı qarqyn keıingi jyldary da saqtalady. Bul 2025 jylǵa deıin shamamen 30 myń km jóndeýge jáne jergilikti mańyzy bar avtojoldardyń 95% - yn jaqsartýǵa múmkindik beredi.