Qazaqstanda jyl sońyna deıin 2,2 myń shaqyrym jol paıdalanýǵa beriledi

NUR-SULTAN. QazAqparat – Qazaqstanda jyl sońyna deıin 2,2 myń shaqyrym jol paıdalanýǵa beriledi. Bul týraly QR Indýstrııa jáne ınfraqurylymdyq damý vıtse-mınıstri Berik Kamalıevtiń tóraǵalyǵymen ótken selektorlyq keńeste aıtyldy, dep habarlaıdy QazAqparat mınıstrliktiń Telegram kanalyna silteme jasap.

Jıyn barysynda «Nurly jol» memlekettik baǵdarlamasy sheńberinde avtomobıl joldary jobalaryn iske asyrý máseleleri qaraldy.

Otyrysqa QR IIDM Avtomobıl joldary komıtetiniń, «QazAvtoJol» UK» AQ jáne merdiger uıymdardyń ókilderi qatysty.

Avtojol jobalaryn iske asyrý barysy týraly «QazAvtoJol» UK» AQ oblystyq fılıaldarynyń jáne merdigerlerdiń esepteri tyńdaldy. 2021 jyly qurylys jáne rekonstrýktsııalaý jalpy uzyndyǵy 3,6 myń shaqyrym bolatyn 95 jol ýchaskesin qamtyǵany atap ótildi. Jyldyń sońyna deıin 1,2 myń shaqyrym jolda qozǵalysty ashyp, 2,2 myń shaqyrym joldy paıdalanýǵa berý josparlanyp otyr.

Jıyn barysynda «Taldyqorǵan-Qalbataý-Óskemen», «Merke-Burylbaıtal», «Qalbataý-Maıqapshaǵaı», «Aqtóbe-Atyraý-Astrahan», «Aqtóbe-Maqat», «Qaraǵandy-Balqash», «Úsharal- Dostyq», «Shamalǵan stantsııasynyń aınalma joly» joldarynyń ýchaskelerindegi jumys barysy talqylandy.

Kezdesý barysynda kóterilgen taǵy bir másele jańa aqyly jol ýchaskelerin engizý boldy. Qazirge deıin jalpy uzyndyǵy 5,8 myń shaqyrym bolatyn 18 ýchaskede 99 basqarý doǵasyn ornatý boıynsha qurylys-montajdaý jumystary aıaqtalǵan.

Berik Kamalıev jobalardyń árqaısysy boıynsha jumysty ýaqytynda jáne sapaly aıaqtaý úshin tıisti nusqaýlar berdi. Búgin qurylys maýsymy tolyǵymen bastaldy, barlyq ýchaskelerde jumys qarqyndy júrgizilýde.