Qazaqstanda jyl saıyn jol-kólik oqıǵalary sany artyp keledi - QR Іshki ister vıtse-mınıstri
ASTANA. 30 qyrkúıek. QazAqparat - Sońǵy 10 jyl ishinde elimizde jol-kólik apattarynan 32 myńnan astam adamnyń ómiri qıyldy.
Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Іshki ister mınıstriniń orynbasary Erlan Turǵumbaev málim etti.
«Qazaqstan joldarynda sońǵy 10 jyl ishinde jol-kólik apattarynan 32 myńnan astam adam qaza tapsa, 168 myńy jaraqattandy»,-dedi vıtse-mınıstr. Onyń sózine qaraǵanda, jol-kólik oqıǵalary sany jal saıyn artyp keledi jáne saldarynan opat bolǵandar azaımaı otyr.
«Bıylǵy 8 aıda 13 myńnan astam jol-kólik apattary tirkelip, 1 823 adam qaza tapty, 17 myńy jaraqat aldy. Byltyrǵy osy kezeńmen salystyrǵan jol-kólik oqıǵalary 57 paıyzǵa, mert bolǵandar 4 paıyzǵa, jaraqat alǵandar 65 paıyzǵa artty»,-dep toqtaldy ol.
Osy oraıda ol elimizde kólik sany eleýli kólemde artqanyn sóz etti.
