Qazaqstanda jyl saıyn jol apatynan 3 myńdaı adam qaza tabady
ASTANA. QazAqparat - Jyl saıyn Qazaqstanda jol apatynan 3 myńǵa jýyq adam mert bolady. Bul týraly búgin Astanada ótip jatqan «Densaýlyq saqtaý salasynyń damýy týraly» atty medıtsınalyq forým barysynda QR Densaýlyq saqtaý jáne áleýmettik damý mınıstrliginiń Medıtsınalyq jáne farmatsevtıkalyq qyzmetti baqylaý komıteti tóraǵasynyń orynbasary Rýslan Nurmuqanov aıtty.
«Elimizde jyl saıyn jol apatynan úsh myńǵa jýyq adam qaza tabady jáne 29 myńdaıy túrli jaraqattar alady. Bul sandar atalǵan máseleniń ózektiligin kórsetedi. Sondyqtan biz jol apattarynyń saldaryn azaıtý boıynsha barlyq sharalardy qolǵa alýymyz qajet», - dedi ol.
Onyń aıtýynsha, sońǵy ýaqyttarda jol apattarynyń 30 paıyzǵa artýyna qaramastan, adam shyǵyny ótken jyldarmen salystyrǵanda bir deńgeıde qalyp otyr.
«Degenmen jyldan-jylǵa kórsetkishter jaqsaryp keledi. Máselen 2012 jyly jol apatynan 20 myń adam, 2013 jyly 32 myń adam japa shekti, al adam ólimi osy jaǵdaılarda 15 paıyzdan 9,2 paıyzǵa azaıdy. Mundaı jetistikterge jetýge jedel járdem jumysynyń jetildirilýi men avtojoldardyń qaýipti jerlerinde qutqarý bólimderiniń ashylýy negiz boldy», - dedi ol.
R. Nurmuqanovtyń aıtýynsha, búgingi tańda Qazaqstandaǵy ólim-jitimniń sebepteri arasynda oqys oqıǵalar, jaraqattaný men ýlaný jaǵdaılary úshinshi oryn alady.
