Qazaqstanda jyl saıyn jetim balalar sany 1 myńǵa azaıyp keledi - QR BǴM
ASTANA. QazAqparat - Qazaqstanda jyl saıyn jetim balalar sany 1 myńǵa azaıyp keledi. Bul týraly búgin QR Bilim jáne ǵylym mınıstri Aslan Sárinjipov vedomstvonyń keńeıtilgen alqa májilisinde aıtty.
«Biz balamaly otbasylyq qurylymdardy jetildirý arqyly balalar úılerindegi jetim balalar sanynyń azaıýyna qol jetkizdik. Jyl saıyn elimizdegi jetim balalardyń sany myńnan astam balaǵa azaıyp, kerisinshe otbasylyq qurylymdarmen qamtylǵan balalardyń sany kóbeıip keledi», - dedi ol.
Mınıstrdiń aıtýynsha, 2015 jyldyń basynan bastap, Memleket basshysynyń tapsyrmasymen ázirlengen jalpyulttyq sharalar jospary iske asyrylýda. Ol boıynsha otbasylyq qundylyqtar, moraldyq-etıkalyq jáne rýhanı-adamgershilik qatynastar nyǵaıtylatyn bolady. Sonymen qatar, bala asyrap alýshylarǵa bir rettik ótemaqy retinde 75 AEK kóleminde qarajat ta beriledi.
