Qazaqstanda jyl saıyn qansha adam týberkýlezden kóz jumady
ASTANA. QazAqparat - Sońǵy 10 jylda Qazaqstanda týberkýlezden qaza tabatyndardyń sany 5,6 esege azaıdy. Bul týraly Ulttyq ftızıopýlmonologııa ǵylymı ortalyǵynyń dırektory Málik Ádenov aıtty, dep habarlaıdy QazAqparat tilshisi.
«Qazaqstanda týberkýlezge shaldyǵý deregi 100 myń turǵynǵa shaqqanda 52 oqıǵany quraıdy. Bul osydan 10 jyl burynǵy derekpen salystyrǵanda 2,4 esege tómen. Sońǵy 10 jylda 2008 jyldan beri ólim-jitim de 5,6 esege tómendedi jáne 2017 jyly 100 myń turǵynǵa shaqqanda 3 oqıǵa boldy», - dedi ol Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy aıasynda BAQ ókilderine bergen suhbatynda.
Sonymen qatar ortalyq dırektory Astanada týberkýlezge shaldyqqan naýqastar sany respýblıka boıynsha eń az ekindigin atap ótti. Elordada bul kórsetkish 100 myń turǵynǵa 2,9 adamnan ǵana keledi.
«Ótken jyly respýblıka boıynsha týberkýlezge shaldyqqandardyń sany 8 myń adamnan sál ǵana kóp boldy. Eger sońǵy 10 jyldyń dınamıkasyn alyp qaraıtyn bolsaq, onda naýqastardyń jalpy sany da 2 ese azaıyp otyr. Qazaqstan - týberkýlezden emdeý, dıagnostıkalaý, aldyn alý syndy barlyq aspektilerdi bıýdjet qarajaty esebinen ótep otyrǵan az ǵana elderdiń biri. Qazaqstanda týberkýlezden emdeýdiń álemdegi barlyq aldyńǵy tehnologııalary qoldanylady. Buǵan qosa, qajetti qural-jabdyqtar barlyq oblys ortalyǵynda bar», - dedi Málik Ádenov.
Aıta keteıik, keshe elordada Dúnıejúzilik densaýlyq saqtaý uıymynyń alǵashqy medıtsınalyq-sanıtarlyq kómek jónindegi jahandyq konferentsııasy bastaldy. Halyqaralyq jıyn qatysýshylaryna Elbasy N.Nazarbaev vıdeojoldaý joldady.
