Qazaqstanda jyl saıyn kámeletke tolmaǵan 5 myń qyz júkti bolyp qalady
ASTANA. QazAqparat - QR Qoǵamdyq damý mınıstri Darhan Káletaev jastar arasynda óz-ózine qol jumsaıtyndar sany azaıyp kele jatqanyn málim etti, dep habarlaıdy QazAqparat.
«Statıstıka boıynsha álemde jyl saıyn 18 jasqa deıin erte ana atanǵan 15 mıllıon qyz tirkeledi. Onyń ishinde 40 paıyzdan astamy túsik jasatady. Bizde jyl saıyn osyndaı jaǵdaıǵa 15-18 jas aralyǵyndaǵy 5 myńnan astam qyz tap bolady», - dedi mınıstr elordadaǵy «Investıtsııa - jastarǵa. Eshkimdi tys qaldyrmaıyq» halyqaralyq konferentsııasynda.
Sonymen qatar, Darhan Káletaev álemdegi jáne Qazaqstandaǵy jastar arasyndaǵy sýıtsıd máselesine toqtaldy.
«Dúnıejújilik densaýlyq saqtaý uıymynyń málimetinshe, jyl saıyn 67 myńǵa jýyq jasóspirim ózine zaqym keltirý saldarynan kóz jumady. Sýıtsıd jasóspirimder arasyndaǵy ólim-jitim boıynsha aldyńǵy oryndaǵy sebepterdiń biri bolyp otyr. Statıstıka komıtetiniń deregine súıensek, Qazaqstanda 14-ten 28 jasqa deıingiler arasynda óz-ózine qol jumsaý oqıǵalary azaıyp keledi. ıAǵnı 2015 jyldaǵy 970-ten 2017 jyly 818-ge deıin tómendedi. Degenmen de bul kórsetkish áli de joǵary», - dedi vedomstvo basshysy.
Mınıstr búginde jastar men olardyń múddelerine memleket saıasatynda erekshe kóńil bólinip turǵanyn atap ótti. Elimizde Jastar jáne otbasy isteri jónindegi komıteti jumys istep jatyr, sondaı-aq barlyq óńirlerde ókiletti memorgandar jasaqtalǵan.
Eki kúnge jalǵasatyn halyqaralyq konferentsııa barysynda jastardy qoldaýǵa arnalǵan usynystar ázirlenedi. Sharaǵa 35 elden júzden astam sheteldik meıman qatysýda. Qazaqstan tarapynan Parlament Májilisiniń depýtattary, ortalyq atqarýshy organdardyń basshylary, sarapshylar men jastar uıymdarynyń ókilderi atsalysyp jatyr.
Budan buryn habarlanǵandaı, Májilis tóraǵasy Nurlan Nyǵmatýlın Elbasy Joldaýy aıasynda jastardyń rólin arttyrýǵa jańa serpin beriletinin atap ótti.
Aıta keteıik, Elbasy bıylǵy Joldaýynda 2019 jyldy Jastar jyly dep jarııalady.
