Qazaqstanda jyl saıyn bes mıllıonǵa jýyq adamǵa ekpe jasalady
ASTANA. 3 qazan. QazAqparat - Qazaqstanda jyl saıyn túrli ınfektsııalyq dertterden bes mıllıonǵa jýyq adamǵa ekpe jasalady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR Densaýlyq saqtaý vıtse-mınıstri Erik Baıjúnisov málim etti.
Elimizdiń halyqyna aqysyz túrde vaktsınalar egý júrgizilip kele jatqanyna toqtalǵan ol: «Ekpe jasaýdyń ulttyq kúntizbesine sáıkes, 21 ınfektsııalyq aýrýǵa qarsy ekpe jasalady. Jyl saıyn biz bes mıllıonǵa jýyq adamǵa ekpe júrgizemiz, onyń ishinde 1,4 mıllıony - balalar. Onyń arasynda qyzylshaǵa, dıfterııa, paleomıelıt, B vırýstyq gepatıti jáne basqa da indetterge qarsy», - dedi.
Osy oraıda vıtse-mınıstr sońǵy 20 jylda qyzylshamen syrqattaný 59 esege, epıdemııalyq paratıtke shaldyǵý 160 esege, B vırýstyq gepatıtimen aýyrý deńgeıi 23 esege tómendegenin sóz etti.
Máselen, 1998 jyly B vırýstyq gepatıtine qarsy vaktsınalaý engizilgen kezde elimizde jyl saıyn dertke shaldyǵýdyń 4 myń 800 oqıǵasy tirkelgen bolsa, búginde onyń 200-ge jýyq jaǵdaıy, al balalar arasynda 2-den 5-ke deıingi oqıǵasy kezdesedi eken. «2002 jyly Dúnıejúzilik densaýlyq saqtaý uıymy bizdiń eldi paleomıelıtten taza, al ótken jyly bezgekten taza aýmaq retinde tanydy», - dep túıdi E. Baıjúnisov.
