Qazaqstanda jyl saıyn azamattyq daýlarǵa 1,5 mln adam tartylady - Q. Mámı
Oǵan QR Joǵarǵy Sotynyń tóraǵasy Qaırat Mámı, QR Ádilet mınıstri Berik Imashev, Konstıtýtsııalyq Keńestiń tóraǵasy Igor Rogov, Joǵarǵy Sot Keńesiniń tóraǵasy A. Smolın, QR Parlamenti Senatynyń depýtaty L. Poltorabatko, QR Bas prokýrorynyń orynbasary J. Asanov, sondaı-aq Joǵarǵy Sottyń sýdıalary, oblystyq jáne olarǵa teńestirilgen sottardyń tóraǵalary, Konstıtýtsııalyq Keńestiń músheleri, úkimettik emes uıymdardyń ókilderi men otandyq marapshylar qatysýda. Sonymen qatar halyqaralyq uıymdar tarapynan EQYU- nyń Astanadaǵy Baǵdarlamalar keńesiniń basshysy Derd Sabo, BUU Damý baǵdarlamasynyń Qazaqstandaǵy Strategııalyq qoldaý departamentiniń basshysy I. Gorıýnova, Eýropalyq Keńestiń Venetsııalyq komıssııasynyń Ortalyq Azııadaǵy joba menedjeri S. Anısımova, EýrAzEQ sotynyń sýdıasy V. Seıtimova, sheteldik kórnekti sarapshylar, ǵalym-quqyqtanýshylar qatysýda.
Konferentsııanyń maqsaty - 2016 jyldyń 1 qańtarynan bastap kúshine engen Azamattyq protsessýaldyq kodekske engizilgen negizgi ózgerister men tolyqtyrýlardyń sapaly iske asyrylýy men keńinen talqylanýyn qamtamasyz etý.
Konferentsııanyń ashylý rásiminde sóılegen sózinde QR Joǵarǵy Sotynyń tóraǵasy Qaırat Mámı protsessýaldyq zańnamaǵa engizilgen basty ózgeristerge toqtaldy.
«Jańa zańdy ázirleýde daýlardy sheshýdiń balamaly tásilderin damytýǵa baǵyttalǵan azamattyq isterdi yńǵaıly ári tez qaraýdyń tártibin qurýǵa basymdyq berildi. Bul sot tórelegin qalpyna keltirý sıpatyn negizdeıdi, daýlardy sheshýdiń ýaqytyn qysqartady. Sondaı-aq, sot óndirisine aqparattyq tehnologııalardy keńinen qoldaný boıynsha jańa normalar, sottardy ınvestorlardyń quqyǵyn qorǵaý boıynsha mamandandyrý júıesi engizildi. Bul bizdiń elimizde ınvestıtsııa men kásipkerlikti quqyqtyq turǵyda qorǵaýdyń jańa deńgeıin qamtamasyz etedi. Elimizde jyl saıyn azamattyq daýlarǵa 1,5 mln adam tartylady. Osyǵan baılanysty, jańa protsessýaldyq zańnamanyń mańyzdylyǵy arta túsedi», - dedi Q. Mámı.
Aıta ketelik, jańa protsessýaldyq zańnamany ázirleý barysynda sońǵy eki jyl ishinde myńnan asa usynystar qaralǵan. Olar memlekettik organdar tarapynan ǵana emes, zańgerlik qaýymdastyqtar men turǵyndar tarapynan da kelip túsken.
Konferentsııa jumysy odan ári jalǵasýda.
