Qazaqstanda jyl saıyn 9,5 tekshe shaqyrym sý únemdeletin bolady
ASTANA. QazAqparat - QR Qorshaǵan orta jáne sý resýrstary mınıstrliginde sý resýrstaryn basqarý memlekettik baǵdarlamasyn júzege asyrý máselelerine arnalǵan jıyn ótti.
«Aldaǵy ýaqytta bizdiń jumystarymyz kóbeıe túsetindigi belgili. Memlekettik baǵdarlamany daıyndaý isine osy júıede jumys isteıtin barlyq salalar tartylyp, olardyń usynystary eskerildi. Sondyqtan sizderdi atalǵan memlekettik baǵdarlamanyń bekitilýimen quttyqtaımyn», - dedi jıyndy ashqan QR Qorshaǵan orta jáne sý resýrstary mınıstri Nurlan Qapparov. Onyń atap ótýinshe, memlekettik baǵdarlamany ázirleý jumystaryna memlekettik organdar, úkimettik emes jáne ǵylymı uıymdar, esimi elge tanymal qazaqstandyq ǵalymdar, aýyl sharýashylyǵy salasynyń, jobalaý ınstıtýttarynyń, halyqaralyq konsaltıngtik kompanııalardyń mamandary qatysqan. Ony ázirleýge kóptegen saraptamalyq materıaldar, atap aıtqanda sý resýrstaryn keshendi paıdalaný jáne qorǵaý syzbalary, memlekettik sý kadastrynyń aqparattary, Geografııa ınstıtýty ǵalymdarynyń bastamasymen jasalǵan TMD aýmaǵyndaǵy teńdessiz «Qazaqstannyń sý resýrstary» monografııasy paıdalanylǵan. Osydan keıin mınıstrlikke qarasty Sý resýrstary komıteti tóraǵasynyń orynbasary Bolat Beknııaz, «Sý bastamalary ortalyǵy» QQ-nyń tóraǵasy Serik Ahmetov sóz alyp, memlekettik baǵdarlamaǵa qatysty óz oılarymen bólisti. Kelesi kezekte sóılegen Sý resýstary komıtetiniń tóraǵasy Islam Ábishev mınıstrlikte atalǵan memlekettik baǵdarlamanyń júzege asyrylýy barysy jylyna 2 márte talqyǵa túsetindigin atap ótti. «Bul baǵdarlamanyń saıası, áleýmettik jáne ekonomıkalyq mańyzy zor. Endigi ýaqytta ony durys, sapaly ári der ýaqytynda júzege asyrý mańyzdy bola túsedi», - dedi I.Ábishev. Jıyndy qorytyndylaǵan mınıstr N.Qapparov baǵdarlamanyń oryndalýyna Sý resýrstary komıtetiniń tóraǵasy Islam Ábishev jeke jaýap beretindigin basa aıtty. «Men sizge, Sý resýrstary komıtetiniń tóraǵasy retinde bul baǵdarlamany saýatty júzege asyrýǵa jeke jaýapkershilik júkteımin. Júzege asyrý sizge júkteledi, al biz barlyǵymyz kómektesetin bolamyz», - dedi mınıstr. Esterińizge sala keteıik, Qazaqstannyń sý resýrstaryn basqarýdyń memlekettik baǵdarlamasy 4 sáýir kúni Elbasy Jarlyǵymen bekitilgen bolatyn. Baǵdarlamanyń negizgi maqsaty - Qazaqstannyń sý qaýipsizdigin sý resýrstaryn basqarý tıimdiligin kóterý arqyly qamtamasyz etý. 2014-2040 jyldar aralyǵynda baǵdarlamany júzege asyrý úshin 8,2 trln. teńge qajet. Onyń 5,4 trln. teńgesi respýblıkalyq jáne jergilikti bıýdjetten bólinetin bolady. Al 2,8 trln. teńgesi - bıýdjetten tys qarajat. Jalpy, baǵdarlamany júzege asyrý nátıjesinde elimizde jyl saıyn 9,5 tekshe shaqyrym sý únemdeletin bolady.
