Qazaqstanda jyl saıyn 600 myń adamnan júrek aýrýlary anyqtalady

ASTANA. QazAqparat – Búgin, 6 shildede Dúnıejúzilik kardıologııa kúni atalyp ótiledi. Bul kún 2000 jyly Dúnıejúzilik júrek federatsııasynyń bastamasymen belgilengen, dep habarlaıdy QazAqparat Densaýlyq saqtaý mınıstrligine silteme jasap.

Kardıolog júrek-qan tamyrlary aýrýlaryn zertteýmen, dıagnostıkalaýmen jáne emdeýmen aınalysady.

Júrek pen qan tamyrlarynyń aýyr aýrýlarynyń 90%-ynda únemi medıtsınalyq tekserýden ótip, profılaktıka sharalarymen aınalysyp, aldyn alýǵa bolady.

Qatty terleý, dene salmaǵynyń tez ósýi, keýde aımaǵyndaǵy aýyrsyný, júrek yrǵaǵynyń buzylýy, bas aınalý, aryqtaý, júrektiń qatty soǵý belgileri kezinde konsýltatsııa alý úshin kardıologke júginý kerek.

Kardıologter júrek-qan tamyrlary aýrýlarynyń birneshe qaýip faktorlaryn ataıdy. Olardyń negizgilerine mynalar jatady: az qımyldaý, temeki shegý, semizdik, emotsıonaldyq kúızelis, shamadan tys tuz, alkogol paıdalaný, durys tamaqtanbaý. Osy sebepterdiń barlyǵy júrek pen qan tamyrlaryna salmaq túsirýge ákeledi.

Jyl saıyn Qazaqstanda 600 myń patsıentte qan aınalymy júıesiniń aýrýlary (QJA) dıagnozy qoıylady jáne QJA-dan 40 myń adam qaıtys bolady.

Elimizde barlyǵy 57 medıtsınalyq uıymda kardıologııalyq, kardıohırýrgııalyq jáne ınterventsııalyq kardıologııalyq kómek kórsetiledi, onda 848 kardıohırýrgııalyq tósek jáne 3 800 kardıologııalyq tósek ornalastyrylǵan.

Qan aınalym júıesi aýrýlarynyń skrınıngi boıynsha 2023 jyldyń 1 toqsanynda 30 859 patsıent qaraldy, 1 132 patsıentte QJA anyqtaldy, 987 patsıent dıspanserlik esepke alyndy.

2023 jyldyń 1 toqsanynda QJA bar 92 myńnan astam patsıent, 2022 jyly barlyǵy 335 myń patsıent emdeldi.

Qazaqstanda qan aınalym júıesiniń aýrýlary, ınsýlt, sondaı-aq jaraqattar, ateroskleroz jáne júrektiń lıpıdter almasýynyń buzylýy kezinde medıtsınalyq kómek kórsetýdi jetildirý boıynsha túrli jol kartalary jumys isteıdi.