Qazaqstanda jyl saıyn 50 myń adam múgedek dep tanylady - mınıstrlik
ASTANA. QazAqparat - Jyl saıyn Qazaqstanda 50 myńǵa tarta adam múmkindigi shekteýli jan retinde jańadan tirkeledi. Bul týraly Parlament Senatynda depýtattarmen kezdesý barysynda Eńbek jáne halyqty áleýmettik qorǵaý mınıstri Mádına Ábilqasymova málim etti, dep habarlaıdy QazAqparat tilshisi.
«Búginde Qazaqstanda 670 myń múmkindigi shekteýli jan turyp jatyr. Onyń ishinde 61,9 paıyzy eńbekke qabiletti jasta, 25,4 paıyzy zeınetkerlik jastaǵy adamdar. Al 12,7 paıyzy 18 jasqa deıingi balalar. Jyl saıyn 50 myńǵa jýyq adam alǵash ret múgedek dep tanylady», - dedi M. Ábilqasymova.
Onyń sózine qaraǵanda, sońǵy jyldary alǵash ret múgedektikke shyǵý boıynsha aýrýlardyń qurylymy ózgermegen. Eresek adamdardyń arasynda qan aınalymy júıesiniń aýrýlary - 26,9 paıyzdy, qaterli isik -19,9 paıyzdy, kez kelgen jaraqattar - 10 paıyzdy, sondaı-aq balalar arasynda damýdyń týa bitken kemistigi - 32,5 paıyzdy jáne júıke-júıesiniń aýrýlary 23,7 paıyzdy quraıdy.
