Qazaqstanda jyl saıyn 20 myńǵa jýyq bos jumys orny tabylady - Qasym-Jomart Toqaev
Senat Tóraǵasynyń aıtýynsha, búgingi jahandaný áleminde básekege qabiletti bolý memlekettiń turaqty damýyna qajetti eń mańyzdy faktorlardyń biri. Al atalǵan faktor kóp jaǵdaıda adamı kapıtaldyń sapasymen ólshense, muny qalyptastyrýdaǵy basty róldi bilim atqarady.
«Qazirgi ýaqyt kásibı mamannan joǵary biliktilikti, utqyrlyq pen ushqyr oıdy, óz bilimin udaıy jetildirip otyrýdy talap etedi. Osyndaı talaptarǵa saı kadrlar daıyndaýdy qamtamasyz etý otandyq bilim berý júıesiniń basty mindeti. Kásiptik tehnıkalyq jáne joǵary bilim berý aǵymdaǵy ǵana emes keleshektegi otandyq ekonomıkanyń bilikti mamandarǵa degen qajettilikterin tolyqqandy qanaǵattandyrýǵa baǵdar alýy tıis», dedi Senat Tóraǵasy. Sonymen qatar, spıker sońǵy ýaqytta gýmanıtarlyq sala mamandaryna degen suranys kúrt túsip ketkenin atap ótti. Onyń aıtýynsha, ekonomıka tehnıkalyq mamandardy talap etip otyr. Soǵan oraı, óndiristiń orta býyn kadrlaryn daıarlaýǵa kóshý mańyzdy. «Eńbek organdarynyń málimetterine súıensek, Qazaqstanda jyl saıyn 20 myńǵa tarta jumys orny bos qalady. Al bul salaǵa naqty kásibı tehnıkalyq bilim ıeleri talap etiledi. Bolashaqta, ınnovatsııalyq ǵylymı qamtymdy ekonomıkaǵa kóshýge oraı joǵary bilikti mamandarǵa suranys budan da arta túsedi. Budan bólek, Elbasy Joldaýynda aıtylǵanyndaı, 2030 jylǵa qaraı eńbek ónimdiligin bes esege arttyrýǵa tıispiz. Al jańa tehnologııalardy ıgerip, zamanaýı quraldardy paıdalanbaı ol tapsyrmany júzege asyrý múmkin emes», - dedi Qasym-Jomart Toqaev.