Qazaqstanda jyl saıyn 20-dan astam adam gazdan ýlanyp kóz jumady
NUR-SULTAN. QazAqparat – Jyl saıyn gazdan ýlaný saldarynan 20-dan astam adam qaza bolady. Bul týraly QR Tótenshe jaǵdaılar mınıstri ıÝrıı Ilın aıtty, dep habarlaıdy QazAqparat tilshisi.
«Jyl saıyn tabıǵı jáne suıyltylǵan gazdan ýlaný saldarynan 20-dan astam adam qaza bolady. Al gaz ballony qurylǵysynyń jarylýynan toptasqan adam ólimi men jaraqattaný oqıǵalary oryn alady. Máselen, ótken jylǵy 9 jeltoqsanda Almaty oblysynyń Jarket qalasyndaǵy dámhanada («Bueno») gazdy aýa qospasynyń jarylýy oryn alyp, saldarynda nysan opyrylyp qulady. Dámhananyń 7 jumysshysy jaraqat aldy, úıdiń 120 turǵyny qaýipsiz jerge kóshirildi», - dedi mınıstr Úkimet otyrysynda.
«Bıyl 1 qarashada Jambyl oblysynda tabıǵı gaz peshiniń tútindik qurylǵysynyń buzylýynan 2 adam qaza taýyp , úsheýi ýlandy. Olar aýrýhanada aýyr halde jatyr», - dedi ıÝ. Ilın.
Onyń sózine qaraǵanda, «Gaz jáne gazben jabdyqtaý týraly» zańǵa sáıkes, turmystyq jáne kommýnaldyq-turmystyq tutynýshylardyń gaz paıdalaný júıeleri men gaz jabdyǵyn qaýipsiz paıdalaný talaptarynyń saqtalýyn baqylaý jergilikti atqarýshy organdarǵa júktelgen.
«Bul rette tek Almaty, Nur-Sultan qalalarynyń, Qostanaı jáne Aqmola oblystarynyń jergilikti bılik oryndarymen gaz-tehnıkalyq ınspektsııalary quryldy, qalǵan óńirlerde fýnktsııa TKSh bólimshelerine júktelgen. Alaıda, bul jumys olarmen júrgizilmeıdi», - dedi vedomstvo basshysy.
Budan buryn habarlanǵandaı, Úkimet otyrysynda Premer-Mınıstr Asqar Mamın bir aı ishinde barlyq óńirde gaz-tehnıkalyq ınspektsııany qurýdy tapsyrdy.
