Qazaqstanda jyl saıyn 2,5 myń bala týa paıda bolǵan júrek aqaýymen ómirge keledi
ASTANA. QazAqparat - Qazaqstanda jyl saıyn 2,5 myń bala týa paıda bolǵan júrek aqaýymen ómirge keledi. Bul týraly búgin Astanadaǵy ІІІ Ulttyq kardıohırýrgter kongresi aıasyndaǵy suhbatynda Ulttyq ǵylymı kardıohırýrgııa ortalyǵynyń balalar kardıohırýrgııasy bóliminiń meńgerýshisi Dmıtrıı Gorbýnov málim etti.
«1000 tiri týǵan nárestege shaqqanda jeteýi ishten júrek aqaýymen ómirge keledi. Bul turǵyda jyl saıyn shamamen 2500-2800 operatsııa jasaý kerek bolady, ıaǵnı osynshama bala jylda bundaı indetpen týady», - dedi ol.
D. Gorbýnovtyń sózine qaraǵanda, osyndaı derti bar balalardyń 40 paıyzyna operatsııany ómiriniń alǵashqy jylynda jasaý qajet. Sonymen qatar bul qatardaǵy sábılerdiń jartysyna atalǵan operatsııany týǵannan keıingi birinshi aıda jasaý kerek.
«Eger de ota jasalmasa, onda olardyń 90 paıyzy óledi. Eń bastysy, bul sábılerge ýaqytyly durys dıagnoz qoıý mańyzdy»,-dedi ol.
Belgili bolǵandaı, búginde bundaı operatsııaǵa qajettilik joǵary bolyp otyr. Osyǵan baılanysty shuǵyl otalar úshin ortalyq avıatsııany paıdalanady.
