Qazaqstanda jyl saıyn 17 myńnan astam bos jumys orny tekke qalyp jatyr - T. Dúısenova
Eske salaıyq, otyrysta depýtattar «Qazaqstan Respýblıkasy men Halyqaralyq Qaıta Qurý jáne Damý banki arasyndaǵy qaryz týraly kelisimdi (Eńbek daǵdylaryn damytý jáne jumys oryndaryn yntalandyrý jónindegi joba) ratıfıkatsııalaý týraly» zań jobasyn maquldaǵan bolatyn.
«Eńbek daǵdylaryn damytý jáne jumys oryndaryn yntalandyrý jónindegi jobada qamtylǵan mańyzdy máseleniń biri - kásibı standarttardy belgileý jáne sol boıynsha oqý standarttaryn ózgertý. Bul bir jaǵynan ulttyq biliktilik júıesine enetin negizgi másele. Óıtkeni, biz jyl saıyn elimizde 17 myńnan astam bos jumys oryndarynyń tekke qalyp jatqanyn aıtyp kelemiz. Sebebi, oqý oryndaryn bitirgen azamattardyń biliktiligi jumys berýshilerdiń talaptaryna kóbine sáıkes kele bermeıdi. Al bul kemshilik jumys berýshilerdiń ózderi oqý protsesine atsalysqanda ǵana sheshimin tabýy múmkin», - deıdi mınıstr.
Onyń aıtýyna qaraǵanda, Ekonomıkalyq yntymaqtastyq jáne damý uıymy elderiniń tájirıbesine sáıkes, kásipodaqtar men jumys berýshiler oqý oryndaryna ózderiniń ulttyq biliktilik júıesindegi salalarǵa sáıkes kásibı standarttar men talaptardy qoıady. Al oqý oryndary sol standarttarǵa sáıkes, oqý baǵdarlamalaryn ózgertedi.
«Biz Dúnıejúzilik bank sarapshylarymen, Ulttyq kásipkerler palatasymen, tıisti memlekettik organdarmen birlesip, 2020 jylǵa deıin 550 kásibı standarttardy ázirlep shyǵarý múmkindigin de qarastyryp jatyrmyz. Mundaı kásibı standarttar tek kadrlar daıarlaýda emes, sonymen birge qaıta daıarlaý barysynda da qamtylýy qajet», - dedi T. Dúısenova.
Eske sala keteıik, Halyqaralyq Qaıta Qurý jáne Damý banki Qazaqstanǵa Eńbek daǵdylaryn damytý jáne jumys oryndaryn yntalandyrý jónindegi jobany qarjylandyrýǵa 100 mln AQSh dollary somasynda qaryz beretin bolady.