Qazaqstanda jyl saıyn 140-qa jýyq adam júrek almastyrý otasyna muqtaj
ASTANA. QazAqparat - Qazaqstanda jyl saıyn 140-qa jýyq adam júrek almastyrý otasyna muqtaj. Bul týraly búgin Túrik áleminiń transplantologııa qaýymdastyǵynyń І Kongresinde «Ulttyq ǵylymı medıtsınalyq ortalyq» AQ bas dırektory Abaı Baıgenjın málim etti.
«Qazaqstanda jyl saıyn 138 adam júrek almastyrý otasyna muqtaj. Baýyr aýystyrýǵa - 250-300, búırekke - 1384, ókpege - 3-5, uıqy bezine - 37 adam. 2012 jyldan beri Qazaqstanda 445 búırek almastyrý, 76 - baýyr jáne 21 júrek almastyrý otalary jasaldy. 2015 jyldyń ishinde 11 adamǵa júrek almastyryldy», - dedi ol.
Onyń aıtýynsha, transplantatsııa jaǵdaıy sol eldegi medıtsına damýynyń basty kórsetkishi bolyp tabylady. Mamandardyń pikirinshe, músheni aýystyrý boıynsha sátti otalar jasalsa, ol memlekettiń medıtsınasy joǵary deńgeıde degen sóz.
Kongreske qatysý maqsatynda Astanaǵa álemniń 30 elinen 350-ge jýyq transplantologııa salasyndaǵy jetekshi mamandar keldi. Qurmetti qonaqtardyń arasynda Túrki áleminiń transplantologııa qaýymdastyǵynyń negizin qalaýshy jáne prezıdenti, medıtsına ǵylymdarynyń doktory Mehmet Haberlı men Kýveıt, Iordanııa, Ulybrıtanııa, Egıpet, Iran, Aýstralııa, Saýd Arabııasy elderiniń jetekshi transplantolog mamandary bar.
Kongress aıasynda transplantologııa salasyndaǵy aspektiler - etıka jáne zańnama, donorlyq, transplantologııa qyzmetin uıymdastyrý jáne úılestirý, aǵzalardy aýystyrý, ımmýnosýpressıvtik terapııa máseleleri talqylanady.
Sonymen qatar, jasy úlken patsıentter men balalarǵa baýyr men búırekti aýystyrýǵa baılanysty qıyn otalardy ótkizý boıynsha sheberlik synyptary ótkiziledi.
